Այնպես չէ, որ Փաշինյանը գյուտ արեց՝ Ծառուկյանին մեղադրելով. Շանթ Հարությունյան. Տեսանյութ

Յուրաքանչյուր ծրագիր իրականացվում է տվյալ երկրի ժողովրդի «ընդունակություններին» համապատասխան: «КГБ»-ն շատ լավ ճանաչում է ժողովրդին ու դրա համար էլ այսպիսի քայլերի է գնում: Այս մասին Անժելա Թովմասյանի՝ Արմնյուզ ՀԸ «Հայելու առաջ» հեղինակային հաղորդման ժամանակ ասել է «Ցեղակրոն» կուսակցության ղեկավար Շանթ Հարությունյանը՝ անդրադառնալով օրերս Եվրոպայի չեմպիոն Ռոման Ամոյանին ոստիկանների կողմից բռնի ձևով բերման ենթարկելուն:

Շանթ Հարությունյանի խոսքով՝ այսօրվա վարչապետ Նիկոլ Փաշինյանը ևս շատ անարդարությունների զոհ է դարձել իրավական համակարգի կողմից, դրա համար էլ ինքն էլ այսօր դարձել է այսպիսին. «Մարդկային տեսակների մեջ ամենավատ բանը «աբիժնիկ» լինելն է: Ես գիտեմ՝ Նիկոլը որոշակի հալածանքների է ենթարկվել ու հիմա նրան նայելով՝ նրա մեջ չեմ տեսնում բարեհոգություն»:

Դիտարկմանը՝ աղետալի չէ՞, որ երկրի ղեկավարն առաջնորդվում է վրեժխնդրությամբ, Շանթ Հարությունյանը նշել է. «Իհարկե աղետալի է: Այնպես չէ, որ 20 տարի երկիրը բարգավաճում էր, Նիկոլը եկավ ավերեց: Անցած տարիներին էլ առաջխաղացում չի եղել»:

Շանթ Հարությունյանը, անդրադառնալով հայ-ռուսական հարաբերություններին, ու դրանում անհատների նշանակությանն, ասել է. «Երբ Ռուսաստանը փլուզվում էր, Պուտինը վերականգնեց իր երկիրը, նույնն էլ Հայաստանում, երբ Քոչարյանը եկավ իշխանության Հայաստանում, նույնն էլ մեզ մոտ էր»:

Շանթ Հարությունյանի խոսքով՝ Քոչարյանը կարողացավ այնպիսի հարաբերություններ հաստատել թե՛ Ռուսաստանի, թե՛ Արևմուտքի հետ, որպեսզի Հայաստանը կարողանա երկու կողմից էլ օգնություն ստանալ:

Խոսելով ներքաղաքական իրավիճակի ու «ԲՀԿ» ղեկավար Գագիկ Ծառուկյանի նկատմամբ իրականացվող քաղաքական ու քրեական գործընթացների մասին՝ Շանթ Հարությունյանն ասել է. «Այնպես չէ, որ Նիկոլը գյուտ արեց՝ Ծառուկյանին մեղադրելով: Այսպիսի բան եղել է բոլոր իշխանությունների օրոք՝ իշխանությանը քննադատողների հետ այսպես են վարվում»:

Հարցին՝ ի՞նչ է այս դեպքում մեզ սպասվում, Շանթ Հարությունյանը պատասխանել է. «Բոլոր գործարարները, ովքեր Նիկոլի դեմ չեն պաշտպանելու Քոչարյանի վերադարձը կա՛մ բանտում են լինելու, կա՛մ քրեական գործեր են հարուցվելու նրանց նկատմամբ»:

Ըստ Շանթ Հարությունյանի՝ եթե այսօր Գագիկ Ծառուկյանին կալանավորեն, նրա բոլոր աշխատակիցները, աջակիցները կգնան մի առաջնորդի հետևից. «Պատահական չէ, որ Գագիկ Ծառուկյանն իր պատգամավորներից հավատարմության ստորագրություն է վերցրել, որովհետև ինքն էլ շատ լավ գիտի, որ մարդը դավաճանող է»:

Շանթ Հարությունյանի համոզմամբ՝ սա ոչ թե Ծառուկյանի ամոթն է, այլ հայ ժողովրդի: