Ես սա դիտում եմ որպես քայլ՝ ուղղված իշխանության յուրացմանը. Դավիթ Հարությունյանը՝ Սահմանադրական փոփոխությունների մասին

Դա ավելի շատ իշխանության յուրացում է: Այս մասին Tert.am-ի հետ զրույցում ասաց Արդարադատության նախկին նախարար Դավիթ Հարությունյանը՝ անդրադառնալով այսօր Ազգային ժողովի հրավիրված արտահերթ նիստին, որտեղ քննարկվում է Սահմանադրական փոփոխությունների հարցը:

«Ես սա դիտում եմ որպես քայլ՝ ուղղված իշխանության յուրացմանը»,-ասաց Դավիթ Հարությունյանը: Նա խնդիր չհամարեց, որ նախագիծը որպես զեկուցող ներկայացնելու է Ազգային ժողովը և ոչ թե կառավարությունը:

Հիշեցնենք, որ «Փաստինֆոյում» Դավիթ Հարությունյանը, անդրադառնալով Սահմանադրության 213-րդ հոդվածի փոփոխության` իշխանության նախաձեռնած նախագծին, նշել էր, որ իշխող քաղաքական մեծամասնության պատգամավորները Ազգային ժողով են ներկայացրել Սահմանադրության 213-րդ հոդվածում փոփոխությունների նախագիծ, որով նախատեսված կարգավորումներն ուղղակիորեն հակասում են Վենետիկի հանձնաժողովի կողմից հունիսի 19-ի կարծիքում և դրանք նախորդած կարծիքներում արտահայտված մոտեցումներին:

«Անթույլատրելի է այն, որ Վենետիկի հանձնաժողովը՝ լինելով իրավունքի գերակայության ապահովմանը կոչված մասնագիտացված և միջազգային հեղինակություն վայելող հանձնաժողով, ակնհայտորեն իր կարծիքում իրավունքը ծառայեցրել է օրվա իշխանությունների քաղաքական նպատակներին։ Իհարկե, Հանձնաժողովը չի գնացել դատական իշխանության անկախության հիմնարար սկզբունքների արմատական զոհողության, սակայն, իր գնահատականներում դրսևորել է կողմնակալ և զիջողական մոտեցում»,-գրել էր Դավիթ Հարությունյանը: