Մենք պարտավոր ենք դուրս գալու կենաց-մահու կռվի. Մանվել Եղիազարյան (տեսանյութ)

Այսօր Ազատության հրապարակում «Օհանյան–Րաֆֆի–Օսկանյան» դաշինքի հրավիրած հանրահավաքին ելույթով հանդես եկավ «Արաբո» ջոկատի հրամանատար, «Օհանյան–Րաֆֆի–Օսկանյան» դաշինքի անդամ Մանվել Եղիազարյանը։ 

Լեգենդար հրամանատարը հիշեց արցախյան պատերազմի տարիները և նորօրյա Հայաստանի իրավիճակը:

«Մենք ուզում էինք սարքել Հայաստան, իսկական հայատեղ, որ աշխարհի հայերով հավաքվեինք, ապրեինք, զգաինք մեզ անվտանգ, մենք դրա համար էինք պայքարում... այսօր մենք ի՞նչ ունենք: Դժբախտ ցնցոտիների մեջ հայրենիք: Ես ամաչում եմ, որ դա իմ հայրենիքն է, թող նա ինձ ների... Մենք ի՞նչ ենք արել մեր երեխայի համար: Մենք հանդուրժել ենք, որ ամեն փոքրոգի մարդ թաքնվել է պատերազմի ժամանակ, չի պայքարել հայրենիքի համար, որ մեզ թալանի, որ հայ աղջիկը տղամարդ չգտնի ամուսնանալու: Դա ենք արել ընդամենը: Ու դուք պարտավոր եք այսօրվա վիճակով փոխել միտքը: Մենք պարտավոր ենք դուրս գալու կենաց-մահու կռվի: Միթե՞ դուք կարծում եք ընտրությունները վերջն է: Ոչ, պայքարը պետք է շարունակվի...», - փոքր ինչ զայրացած ու շատ մտահոգ ասաց լեգենդար հրամանատարը:

Մանրամասները ՝ Zham.am-ի տեսանյութում:

Zham.am