Կկալանավորվի՞ Ծառուկյանը, թե՞ ոչ․ դատարանը գնացել է խորհրդակցական սենյակ. Տեսանյութ

Երևանի ընդհանուր իրավասության դատարանի Շենգավիթի նստավայրում շարունակվում է «Բարգավաճ Հայաստան» կուսակցության ղեկավար Գագիկ Ծառուկյանի կալանքի հարցով քննությունը։

Հիշեցնենք՝ պաշտպան Երեմ Սարգսյանը երեկ տեղեկացրել էր, որ դատավոր Ռոբերտ Պապոյանը մերժել է իրենց ներկայացրած ինքնաբացարկի միջնորդությունը։ «Որոշումը ստանալուց հետո կծանոթանանք և դրա վերաբերյալ դիրքորոշում կարտահայտենք»,- ասել էր նա։

Միջնորդությունը կապված էր միջդատական վարույթների մակագրությունների կարգի հետ։

***

Դուրս գալով դատարանի շենքից՝ ԲՀԿ առաջնորդ Գագիկ Ծառուկյանը տեղեկացրեց, որ դատարանը գնացել է խորհրդակցական սենյակ՝ որոշում կայացնելու։ Այն կհրապարակվի կիրակի։ «Այս հոդվածով մինչև այսօր, որ ինչ որ կալանավորելու, ձերբակալելու միջնորդություն ներկայացնեն ազգային օլիմպիական կոմիտեի նախագահին, քաղաքական երկրորդ ուժին․․․ մենակ մի բան կասեմ՝ եթե համաճարակ է, աղքատություն, ես մեղավո՞ր եմ, եթե այո, պատրաստ եմ ինքնակամ գնալու, պատիժ կրելու։ Ինձ համար զարմանալի է ամեն ինչը»,- ասաց Ծառուկյանը։

Որոշումը կհրապարակվի այս կիրակի:  Լրագրողների հետ զրույցում Ծառուկյանի փաստաբանների Սամվել Դիլբանդյանն ասաց, որ ներկայացված միջնորդությունն անօրինական ու անհիմն է. «Մեր կողմից բոլոր առարկությունները ներկայացվել է։ Կարծում եմ, որ դատարանը կլինի իր բարձրության վրա եւ ներկայացված միջնորդությունն անպայման կմերժվի»։

Նշենք, որ Գագիկ Ծառուկյանին մեղադրանք է առաջադրվել ընտրակաշառք տալու համար։ Նա իրեն առաջադրված մեղադրանքը չի ընդունում եւ այն որակում է շինծու գործ։