Դատավոր Ալեքսանդր Ազարյանի վերաբերյալ կարգապահական գործի քննությունը հետաձգվեց. Տեսանյութ

Բարձրագույն դատական խորհուրդը հետաձգեց ՀՀ վերաքննիչ քրեական դատարանի դատավոր Ալեքսանդր Ազարյանի վերաբերյալ կարգապահական գործի քննությունը։

Դատական հաջորդ նիստը կկայանա հունիսի 29-ին՝ ժամը 14։10-ին։

Այսօրվա նիստի ժամանակ ԲԴԽ անդամներից Մեսրոպ Մակյանն ու Հայկ Հովհաննիսյանը ինքնաբացարկի միջնորդություններ ներկայացրեցին, սակայն երկուսն էլ մերժվեց։

Մեսրոպ Մակյանը ինքնաբացարկի միջնորդություն ներկայացրեց՝ նշելով, որ ինքն Ազարյանի փաստաբան Տիգրան Աթանեսյանի կրտսեր որդու քավորն է։ Բացի այդ, ինքն ու Աթանեսյանը երկար տարիների ընկերներ են։

Արդարադատության նախարար Ռուստամ Բադասյանն ասաց, թե բոլոր հիմքերն առկա են, որպեսզի Մեսրոպ Մակյանն ինքնաբացարկ ներկայացնի։

Տիգրան Աթանեսյանը, սակայն, նշեց՝ կարծում է, որ պետք է Մեսրոպ Մակյանի դիմումը մերժվի, քանի որ գործը վերաբերում է ոչ թե իրեն, այլ՝ դատավոր Ազարյանին։

Հայկ Հովհաննիսյանն էլ ինքնաբացարկի երկու պատճառաբանություն ներկայացրեց։

Դիմումը, որի հիման վրա վարույթ է հարուցվել Ալեքսանդր Ազարյանի նկատմամբ, նմամատիպ բովանդակությամբ վարույթ հարուցվել է նաև իր նկատմամբ։ Բացի այդ, Հայկ Հովհաննիսյանն ասաց, որ կարգապահական վարույթը հարուցվել է ՀՔԾ պետ Սասուն Խաչատրյանի դիմումի հիման վրա, իսկ ինքը Սասուն Խաչատրյանի համակուրսեցին է եղել և մտերիմ կապեր ունի վերջինիս հետ։

Հիշեցնենք՝ կարգապահական վարույթը հարուցվել է Արդարադատության նախարար Ռուստամ Բադասյանի կողմից՝ ՀՔԾ պետ Սասուն Խաչատրյանի հաղորդման հիման վրա:

Ալեքսանդր Ազարյանի նկատմամբ կարգապահական վարույթ հարուցելու վերաբերյալ հաղորդումն Արդարադատության նախարարություն է ներկայացրել ՀՔԾ՝ կոռուպցիոն, կազմակերպված և պաշտոնեական հանցագործությունների քննության վարչության պետի տեղակալ Հրաչյա Մուշեղյանն, ում վարույթում քննվել է «5-րդ ալիք»-ի սեփականատեր Արմեն Թավադյանի վերաբերյալ քրեական գործը։

Աղբյուրը՝ aysor.am