Ռոման Ամոյանն, ազգությամբ եզդի լինելով, իմ Հայաստանի հիմն է աշխարհում հնչեցրել՝ ստիպելով աշխարհի շատ ազգերին ոտքի կանգնել․ Իսրայել Հակոբկոխյան. Տեսանյութ

Ռոման Ամոյանն, ազգությամբ եզդի լինելով, իմ Հայաստանի հիմն է աշխարհում հնչեցրել՝ ստիպելով աշխարհի շատ ազգերի ոտքի կանգնել։ Դուք տեսա՞ք՝ ինչպես նրան բերման ենթարկեցին, ջղայնությունից «տեղս չեմ գտնում»։ Այս մասին Արմնյուզ ՀԸ՝ Անժելա Թովմասյանի հեղինակային «Հայելու առաջ» հաղորդման ժամանակ ասել է բռնցքամարտիկ Իսրայել Հակոբկոխյանն՝ անդրադառնալով երեկ ԱԺ-ի դիմացից Եվրոպայի չեմպիոն, ըմբշամարտիկ Ռոման Ամոյանին բռնի ձևով բերման ենթարկելուն։

Հիշեցնենք, որ երեկ ԱԺ օրակարգում «Բարգավաճ Հայաստան» կուսակցության նախագահ Գագիկ Ծառուկյանին անձեռնմխելիությունից զրկելու հարցն էր, որին զուգահեռ ԱԺ-ի դիմաց էին հավաքվել Գագիկ Ծառուկյանի աջակիցները, որոնց թվում էր նաև Ռոման Ամոյանը, ում բերման էին ենթարկել։

Իսրայել Հակոբկոխյանի խոսքով՝ երեկ ոստիկանները հարձակվել էին փոքրամարմին, բայց հոգով մեծ մարդու վրա․ «Ուզում էիք Ռոմանին փռել ասֆալտի՞ն։ Ասֆալտին փռվելը վատ բան չէ, դրանից վախենալն է ամոթ։ Ռոմանը տղավարի կանգնել էր ու հարյուր հոգով վրան հարձակվեցին»։

Իսրայել Հակոբկոխյանի համոզմամբ՝ այդ ոստիկաններից յուրաքանչյուրն առանց ոստիկանական համազգեստի չէր կարող կանգնել Ռոմանի դեմ․ «Ռուսաստանի ընկերներս էին զանգել ու ասում՝ Նիկոլին ասեք, բռնվի։ Պուտինին ասելու ենք՝ Հայաստանում ոնց են վերաբերվում անվանի մարզիկներին»։

Բռնցքամարտիկի համար անհասկանալի էր ԱԺ պատգամավոր, մարզիկ Արսեն Ջուլֆալակյանի պահվածքը․ «Բա տեսար, որ տենց բան է տեղի ունենում Ռոման Ամոյանի հետ։ Վազեիր, հասնեիր ու ասեիր, որ միասին եք մարզվել, մի սեղանից հաց կերել»։

Դիտարկմանը՝ այս իշխանության օրոք նախագահ են կալանավորում, ընդդիմադիրներին փռում ասֆալտին ու բերման ենթարկում և հանրության կողմից ընդվզում չի լինում, գուցե այդպես էլ իշխանությունը մտածում է՝ տեղին են իրենց քայլերը, բռնցքամարտիկը նշել է․ «Ինձ համար ամոթալի էր, որ տաս լավագույնները վարչապետի ձեռքից գումար ստացան ու հիմա մտածում են՝ դե լավ է, ինչ ուզում է լինի իրենց գործընկերոջը»։

Մանրամասները՝ կից տեսանյութում։