Նիկոլ Փաշինյանը 10 րոպեում 6 անգամ հնչեցրեց իր կոչը. Տեսանյութ
ՀՀ վարչապետ Նիկոլ Փաշինյանը ԱԺ հատուկ նիստին, քննադատություններին ու պատգամավորների ելույթներին անդրադառնալու փոխարեն վեց անգամ կրկնեց ՀՀ կառավարության՝ դիմակ կրելու, սոցիալական հեռավորություն ու հիգիենայի կանոնները պահելու մասին կոչը:
«Մտածում էի՝ ինչպես օգտագործեմ եզրափակիչ ելույթի իմ 10 րոպեն, որ այն իրոք լինի օգտակար: Այն ինչ-որ հնչեց բոլոր ելույթներում դրանք բոլորը կարևոր են, կարևոր հարցեր են: Ձեր թույլտվությամբ, ես որևէ հարցի չանդրադառնամ, դրանց կանդրադառնամ հընթացս, մանավանդ, որ դրա հնարավորությունը ունեմ: Եվ հիմա ուզում եմ 10 րոպեի ընթացքում անել ընդամենը մեկ հայտարարություն, ինչն այս օրերին ՀՀ կառավարության անունից հնչում է ամեն օր և ամեն օր բազմաթիվ անգամներ»,- ասաց նա եվ 6 անգամ կրկնեց կառավարության կոչը:Կոչը ներկայացնում ենք՝ ստորև․
«Ուշադրությու՛ն, խոսում է Նիկոլ Փաշինյանը:
Սիրելի հայրենակիցներ, Հայաստանի Հանրապետությունում կորոնավիրուսի համաճարակ է:
Բոլորիդ կոչ եմ անում կրել դիմակներ եւ դրանք հանել միայն սնվելիս: Դիմակը պետք է կրել այնպես, որ այն փակի ձեր քիթը եւ բերանը: Պարբերաբար ախտահանեք ձեր ձեռքերը եւ չախտահանված ձեռքերով մի դիպեք ձեր դեմքին:
Պահպանեք մեկուկես մետր սոցիալական հեռավորություն եւ բացառեք առանց դիմակի շփումը ձեր ընտանիքի անդամ չհանդիսացող անձանց հետ:
Սիրելի հայրենակիցներ, կրեք դիմակներ եւ դրանով կփրկեք հարյուրավոր կյանքեր:
Դիմակները անհրաժեշտ է փոխել երեք-չորս ժամը մեկ: Կարող եք օգտագործել ոչ միայն գործարանային արտադրության, այլեւ ձեր կողմից պատրաստած դիմակներ:
Սիրելի հայրենակիցներ,
շնորհակալություն եմ հայտնում մեր այն հայրենակիցներին, ովքեր պահպանում են հակահամաճարակային կանոնները կամ եթե նույնիսկ նախկինում չեն պահպանել, այս կոչին անսալով կսկսեն պահպանել դրանք»։
Մանրամասները՝ տեսանյութում։
Հետևեք մեզ Facebook-ում