Ցավալի է գիտակցել, որ մեր երկրի իշխանությունները ձախողել են համարյա բոլոր ոլորտները, բայց դա այդպես է

Իշխանական ագիտպրոպը կոմունիստական կամ, եթե կուզեք, երրորդ ռեյխի քարոզչական լավագույն ավանդույթներով լծված է մի գործընթացի, որի տրամաբանությունը կարճ կարելի է բնութագրել հետևյալ նախադասությամբ` մենք (իշխանությունները) բավականին էֆեկտիվ ու ակտիվ պայքարում ենք կորոնավիրուսի և «նախկինների» դեմ (իհարկե, այս պայքարի ձևը և՛ անհասկանալի է, և՛ անընդունելի. ինչո՞ւ պետք է պայքարել սեփական հայրենիքի քաղաքացիների դեմ), սակայն դուք (ժողովուրդը) մեզ հուսախաբ եք անում՝ այսպիսով լուծելով իշխանության համար մի քանի կարևոր խնդիր` սեփական անճարության և ձախողման պատասխանատվության թոթափում, քաղաքական էժանագին ու կարճաժամկետ դիվիդենտների հավաքագրում և իշխանության ղեկին մնալու այդքան բաղձալի ժամանակը երկարաձգելու վերջին ճիգ: Ինչո՞ւ վերջին, քանի որ նախկինում տրված խոստումների շրջանցումը կամ, լավագույն դեպքում, թերի կատարումը շատ արագ սպառեց նեոհայաստանականների քաղաքական կապիտալը` ժողովրդի վստահության քվեն: Դա է պատճառը, որ օրեցօր ավելի խորացող քաղաքական ճգնաժամը հանգուցալուծելու անճարությունից իշխանական և փոքրաթիվ պրոիշխանական ուժերն անողոք պայքար են սանձազերծել քաղաքական հակառակորդների դեմ ամենատարբեր մեթոդներով` բամբասանքից մինչև քրեական գործեր ու դատական ատյաններում դիմումներ: Դրա արդյունքում իշխանության դեմ արտահայտվող ուժերի կոնսոլիդացիան կարելի է ասել ձեռք է բերել կայծակնային արագություն, իսկ ժողովրդական ճակատն ավելի է ստվարանում:

Իհարկե, ցավալի է գիտակցել, որ մեր երկրի իշխանությունները ձախողել են համարյա բոլոր ոլորտները, բայց դա այդպես է: Իսկ եթե դրան էլ գումարենք վերջին շրջանում ներկայացված կոռուպցիոն սկանդալները, ապա մնում է միայն կարեկցել մեզ և հուսալ, որ ձախողած իշխանությունը, նախարարի ներողությունից զատ, ավելի լուրջ քայլերի կգնա և դրսևորելով բարձր քաղաքական կամք՝ կներկայացնի կառավարության հրաժարականը: Թող հաջորդ իշխանությունը լինի ազգային-պետական գաղափարների շուրջ միավորված և հզորացնի մեր երկիրը:

Աստված պահապան բոլորիս:

Մարիամ Ավագյանի ֆեյսբուքյան էջից