Ուժային կառույցներում նման կադրային փոփոխությունները և հստակ հիմնավորումների բացակայությունը վկայում են իշխանության ամենաբարձր շերտերում չափազանց խորը, ծայրահեղ պարանոիդ ճգնաժամի մասին․ Ա․ Սաղաթելյան
Որպես կանոն, ճգնաժամի ընթացքում տարբեր երկրների իշխանություններ մեծացնում են ուժայինների թիվը քաղաքացիական կառույցներում, քանի որ հենց ուժայիններն են, ի տարբերություն «քաղաքացիականների», առավել հարմարված օպտիմալ որոշումների արագ կայացմանը և ի վիճակի են ապահովել դրանց առավել կոշտ իրականացումը: Այս մասին ֆեյսբուքյան իր էջում գրել է հասարակական–քաղաքական գործիչ Արման Սաղաթելյանը:
««Ուժային» և «ռեֆորմիստական» կառավարումը մենեջմենթի երկու՝ սկզբունքորեն տարբեր հայեցակարգեր են, և որպես կանոն, նախապատվությունն այս կամ այն հայեցակարգին կախված է ժամանակահատվածից, առկա մարտահրավերներից և, որպես հետևանք, ընտրված ռազմավարությունից: Բավական է վերընթերցել Եվրոպայի հետպատերազմական պատմությունը, որպեսզի պատկերավոր կերպով համոզվենք, թե ինչպես են այդ երկու հայեցակարգերը փոխարինել մեկը մյուսին. ուժայինները, որոնք պահանջված էին խիստ ճգնաժամի և պատերազմի ժամանակահատվածում, գործից հեռանում էին, երբ ճգնաժամը վերանում էր, և կրկին վերադառնում արդեն նոր ճգնաժամի շրջանում (Ուինսթոն Չերչիլ, Շառլ դը Գոլ և ուրիշներ):
Սակայն անգամ հրադադարի ժամանակահատվածում դժվար է գերագնահատել ուժայինների և ուժային կառույցների դերը: Հատկապես, երբ այդ հրադադարը բավականին հարաբերական է, ներքին և հատկապես արտաքին սպառնալիքները ոչ ոք չի չեղարկել, իսկ «Covid-19»-ի հետ կապված ճգնաժամային կառավարումը երկրում ամբողջովին տապալված է: Եվ տապալված է, քանի որ ուժայինների և ճգնաժամային կառավարման փորձ ունեցող մարդկանց փոխարեն որոշումներ են ընդունել ընդհանրապես նշանակալի փորձ, գիտելիքներ և հմտություններ չունեցող մարդիկ:
Սակայն խոսքն անգամ դրա մասին չէ: Խոսքը միանգամից երկու ուժային կառույցների ղեկավարների և երկրի ամենաբարձրաստիճան ռազմական պաշտոնյայի (ԶՈՒ ԳՇ պետ) փոփոխության մասին է: Մեկ օրում նմանօրինակ կադրային փոփոխությունները, հստակ հիմնավորումների բացակայությունը, երկու տարում ոստիկանության կազմում և ԱԱԾ-ում կադրային փոփոխությունների քանակը, ինչպես նաև վերջինում նոր նշանակման բնույթը վկայում է իշխանության ամենաբարձր շերտերում չափազանց խորը և արդեն, թերևս, ծայրահեղ պարանոիդ ճգնաժամի մասին:
Դեռ մի կողմ թողնենք ուժային կառույցներում կադրերի բաշխման հարցը, որոնց պատրաստման համար կարող են տասնամյակներ պահանջվել: ԱԱԾ՝ հրաժարական ներկայացրած ավագ սպային (մայոր և ավելի բարձր) չես փոխարինի փողոցից բերած ինչ-որ թեկնածուով: Որքա՞ն սպաներ են ազատվել «տեղակալի» նախորդ նշանակումից հետո, և դեռ որքա՞ն կհեռանան այժմ: Լսեցի այն մտքերը, որոնք հնչել են ԱԱԾ ղեկավար կազմի առաջ: Լսածիցս հետո դժվար է մնալ թույլատրելիի սահմաններում, և այն, ինչ կարող եմ անել տվյալ պահին, երկաթյա համբերություն մաղթելն է պետության կարևորագույն կառույցներից մեկի սպաներին, որը խաղալիք է դարձել խարդախների ձեռքում:
Հասկանալով տվյալ նշանակումների իրական մտադրությունը՝ հույս ունեմ, որ ուժ կգտնեք ձեր մեջ զերծ մնալու այնպիսի գործողություններից, որոնք անհամատեղելի են ձեր իրական առաքելության և սպայի պատվի և արժանիքի հետ: Պատիվ ունեմ»,- գրել է Արման Սաղաթելյանը:
Հետևեք մեզ Facebook-ում