1000 դրամների հիմնադրամն իմ դեմ հայց է ներկայացրել․ պարտավոր եմ միջնորդություն ներկայացնել, որ վարչապետին հրավիրեն վկայություն տալու, որովհետև հիմնվել եմ նրա՝ ինձ տված փաստաթղթի վրա․ Տիգրան Ուրիխանյան

Զինծառայողների կյանքին կամ առողջությանը պատճառված վնասների հատուցման հիմնադրամի գործադիր տնօրենը (1000 դրամների հիմնադրամ) դատական հայց է ներկայացրել պատգամավոր Տիգրան Ուրիխանյանի դեմ: Tert.am-ի հետ զրույցում պատգամավորն ասաց, որ իրենից պահանջում են հերքել խորհրադարանում հնչեցրած հայտարարությունները, թե 1 մլրդ 900 մլն դրամ գումար չի փոխանցվել հիմնադրամին:

«Ուշադրություն, պետական կառույցը, որի ղեկավարը կառավարության անդամ, Պաշտպանության նախարար Դավիթ Տոնոյանն է, որի խորհրդի կազմը ձևավորվում է վարչապետի կողմից ձևավորված կառավարության որոշումներով, դատարան է դիմել՝ պահանջելով հերքել այն, ինչը ես հնչեցրել եմ վարչապետ Փաշինյանի կողմից ինձ տված տեղեկանքից ելնելով, այն նույն փաստաթղթի, որն արդեն վարակակիր Փաշինյանը մի քանի օր առաջ բոլորի աչքի առաջ փոխանցել էր ինձ»,-ասաց նա:

Տիգրան Ուրիխանյանը պարզաբանեց, որ վարչապետի օգնականի կողմից էր մակագրվել փաստաթուղթը, որտեղ գրաված էր, որ 1մլրդ 900 մլն դրամի ֆինասական պարտավորություններ այս պահի դրությամբ կատարված չեն հիմնադրամի նկատմամբ:

«Ընդ որում, այդ փաստաթուղթը ձևավորվել է և ինձ էլեկտրոնային ճանապարհով պաշտոնապես ուղարկված է եղել երկու ամիս առաջ: Հավանաբար կամ կառավարության մեջ իրար չեն հասկանում, ինչը վերջերս հաճախակի է լինում, չեն շփվել, չեն քննարկել, ինչ գործ են անում, ինչի վերաբերյալ են դատական հայց ներկայացնում, կամ Դավիթ Տոնյանը ձեռնարկել է մի քայլ, որի արդյունքում ես պարտավոր եմ լինելու, ըստ էության, դատարանում միջնորդություն ներկայացնել, որ վարչապետին հրավիրեն վկայություն տալու համար, կամ որպես պատասխանող կողմ ներգրավեն, որովհետև հիմնվել եմ ՀՀ վարչապետի կողմից ինձ տված փաստաթղթի վրա»,-ասաց նա:

Տիգրան Ուրիխանյանի խոսքով ՝ իր դեմ ներկայացված դատական հայցն անհիմն է, անհեռանկար և ինքը շարունակելու է հարցադրել ՝ ուր են հաշվետվություններում չերևացող գումարները:

Մանրամասները՝ տեսանյութում