Ես իհարկե ցավում եմ նման զարգացումների համար, բայց մեր երկրի անվտանգության շահը պահանջում էր կայացնել նման որոշումներ. վարչապետը՝ պաշտոնանկությունների մասին
Ես իհարկե ցավում եմ նման զարգացումների համար, բայց կարծում եմ, որ այս իրավիճակում մեր երկրի անվտանգության շահը, պետական կառավարման որակի և կարգապահության շահը պահանջում էր կայացնել այսպիսի որոշումներ: Այս մասին պարետատան նիստից հետո կայացած ճեպազրույցի ընթացքում հայտարարեց ՀՀ վարչապետ Նիկոլ Փաշինյանը՝ անդրադառնալով իր որոշմանը, համաձայն որի՝ գեներալ-լեյտենանտ Արտակ Դավթյանն ազատվել է ԶՈՒ ԳՇ պետի պաշտոնից, գնդապետ Էդուարդ Մարտիրոսյանը՝ ԱԱԾ տնօրենի, գնդապետ Արման Սարգսյանը՝ ՀՀ ոստիկանապետի:
«Ճգնաժամը նրանով է ճգնաժամ, որ շատ դեպքերում իրար է խառնում մարդկային, ընկերական, պաշտոնական հարաբերություններ, և ես ուզում եմ երջանկություն մաղթել բոլոր նորապսակներին և նաև գեներալ-լեյտենանտ Արտակ Դավթյանի որդուն, հարսին, նաև հույս ունենալ, որ նրանք երջանիկ ընտանիք կձևավորեն: Էլի ուզում եմ ասել, որ շատ հաճախ ճգնաժամային իրավիճակներում որոշումները միանշանակ չեն լինում, բայց հասնում է մի գիծ, երբ կարգապահությունը, կարգուկանոնը արտակարգ դրության և երկրի ղեկավարի ասածներից բխող գործողությունների ճշգրիտ և անվերապահ կատարումը դառնում է առաջնահերթութուն և ստանում է առաջնահերթություն մնացած բոլոր հարցերի վերաբերյալ»,-ասաց Փաշինյանը:
Նա ընդգծեց, որ առավել ևս պետական կառավարման և ՏԻ բոլոր մարմինները պետք է սեփական օրինակով ի ցույց դնեն ծայրաստիճան և անվերապահ կարգապահություն, որ կարողանան սեփական օրինակով քաջալերել հայրենակիցներին և օր առաջ հաղթահարել այս ճգնաժամը:
«Ինչ վերաբերում է մեր հարգելի գործընկերներին, ես այսօր ասել եմ, որ չեմ կարծում, թե ՀՀ-ին և հայ ժողովրդին ծառայություններ մատուցելու նրանց պոտենցիալը սպառված է, և ըստ իրավիճակի, հնարավոր եմ համարում, որ մենք քննարկենք նաև հետագա ծառայությությունների հարցը»,-ասաց վարչապետը:
Մանրամասները՝ Tert.am-ի տեսանյութում:
Հետևեք մեզ Facebook-ում