Ըստ սոցհարցումների, ՕՐՕ դաշինքը բավականին ծանրակշիռ տեղ ունի. Վարդան Օսկանյան (Տեսանյութ)

«Համարում ենք, որ դա քաղաքական հետապնդում է: Այնքան ժամանակ քանի դեռ թափանցիկ և համոզիչ փաստեր չեն ներկայացվում, համարում եմ, որ Սամվել Բաբայանը քաղաքական բանտարկյալ է, ինչպես բոլոր մյուսները՝ Ժիրայր Սեֆիլյանը, Անդրիաս Ղուկասյանը, «Սասնա Ծռերի» տղաները և բոլոր մյուսները», - այսօր հրավիրված մամուլի ասուլիսի ժամանակ ասաց ՕՐՕ դաշինքի անդամ, «Համախմբում» կուսակցության նախագահ Վարդան Օսկանյանը:

«Համամիտ եմ, որ «Սասնա Ծռերի» հետ կապված ոստիկանների մահվան փաստը կա: Այնտեղ պետք է արդար դատավարություն լինի, քննություն լինի, դա հասկանալի է, ընդունելի է: Բայց մնացածի մասով կարող եմ ասել, որ իրենք քաղբանտարկյալներ են, երբ լինի իշխանափոխություն, կարծում եմ, որ ցանկացած այլ քաղաքական ուժ շատ արագ այդ տղաներին բանտից  ազատ կարձակեն»:

Վարդան Օսկանյանը նաև բարձրաձայնեց նախընտրական արշավի ընթացքում տեղ գտած ապօրինությունները, նշելով, որ դրանք արդեն զանգվածային բնույթ են սկսել կրել:

«Հայաստանի նորագույն պատմության մեջ, երբ բազմաթիվ ընտրություններ են արդեն եղել, երբեք այսքան շուտ ընտրատեղամասերից դուրս այսքան մասսայական, այսքան բացահայտ ընտրակեղծիքներ դեռևս չեն եղել», - հայտարարեց նախկին արտգործնախարարը, հիշեցնելով ձայնագրությունների հետ կապված սկանդալը, և այն, որ ՕՐՕ դաշինքն արդեն դիմել է ԿԸՀ-ին, որ ՀՀԿ-ի մասնակցությունն այս ընտրություններին չեղյալ համարվի:

Վարդան Օսկանյանը կոչ արեց իրավապահներին արդեն իսկ առկա բավարար փաստերի հիման վրա լուրջ աշխատանքներ տանեն:

Ինչ վերաբերվում է ընտրություններից առաջ «Գելափ»-ի ներկայացրած տարբեր քաղաքական ուժերի հասարակության կողմից աջակցության ցուցանիշներին, Վարդան Օսկանյանն ասաց, «Ինձ համար այդ կազմակերպությունը պարզապես գոյություն չունի...Կարող եմ նշել մեր դաշինքի կողմից պատվերված արդարացի հարցումների վերաբերյալ: Առաջինը՝ ՀՀԿ-ն շատ ցածր ռեյտինգ ունի: Առաջին տեղում է, այսպես, բացահայտ առավելությամբ «Ծառուկյան դաշինքը»: Մենք այդ բոլորի մեջ ունենք բավականին ծանրակշիռ տեղ, որը մեր ժողովրդին պետք է հույս տա, որ ապրիլի 2-ի ընտրություններից հետո ռեալ հնարավորություն կա: Այո, լրջագույն համագործակցության մեր դաշինքի ու ընտրությունների արդյունքում առաջին տեղը ստացած դաշինքի միջև խորքային համագործակցության», - եզրափակեց նա:

Zham.am