Պարոն Թորոսյան, կոչով դիմեք քաղաքացիներին չօգտագործել օֆիսային օդորակիչներ. հետո չասեք մոռացել էիք

Ինչպես հայտնի է ամռան ամիսներին քաղաքացիները շոգից պաշտպանվելու համար լայնորեն օգտագործում են օդորակիչներ: Այսօր, երբ կառավարությունը լայնորեն քարոզում է դիմակներ կրել գրեթե ամենուրեք, մոռացել է, որ օֆիսային տարածքներում  կորոնավարակի տարածմանը կարող են նպաստել նաև օդորակիչների աշխատանքը: Հատկապես դա վերաբերվում է կենտրոնական օդորակիչներին, որոնք կարող են լինել վիրուսի տարածման ամենաարագ աղբյուրը:

Երբ  վիրուսակիրն մտնում է սենյակ և որոշ ժամանակ անց հեռանում, ապա օդորակիչների աշխատանքի դեպքում վիրուսակիրից վարակվելը կարող է լինել ավելի հեշտ, քան նրանց բացակայության դեպքում: Բանն այն է, օդորակիչների  աշխատանքի դեպքում, օդակաթիլային ձևով վարակվելու հավանականությունը մեծանում է մի քանի անգամ: Այդ իսկ պատճառով արտերկրի  հիվանդանոցներում,  օֆիսային տարածքներում օդորակիչների աշխատանքը արգելվում է:

Իհարկե տեսականորեն օդորակիչները կարելի է պարբերաբար մաքրել, որպեսզի նրանց աշխատանքը դառնա անվտանգ: Սակայն ո՞վ երաշխիք կտա, որ այդ մաքրման աշխատանքները պարբերաբար կլինեն և ամենակարևորը մաքրումը ճիշտ ձևով կանցկացվի:

Բնականաբար, տներում գործող  օդորակիչներին դա չի վերաբերվում, քանզի տանը  օտար մարդկանց մուտք ու ելք  սովորաբար չի լինում:

Այս ամենը մենք այսօր ենք զգուշացնում, որ վաղը, երբ վարակը օֆիսներում ավելանա մեր իշխանությունները օրվա կուրսով չհայտարարեն, թե վիրուսի տարածումը հենց օդորակիչների աշխատանքի պատճառով է եղել:

Պարոն Թորոսյան, գոնե այս անգամ  վտանգավոր զարգացումները փորձեք նախօրոք կանխել, այլ ոչ թե դրանց հետևից փորձեք գնալ:

Հենց այսօր կոչով դիմեք քաղաքացիներին, որպեսզի քաղաքացիները  օֆիսային տարածքներում զերձ մնան  օդորակիչներ օգտագործելուց:

Հասմիկ Գրիգորյան