Վեդիի դատարանի 6 աշխատակցի մոտ կորոնավիրուս է հաստատվել, 3 վարակված էլ Վճռաբեկ դատարանում կա

Արարատի և Վայոց Ձորի մարզերի ընդհանուր իրավասության դատարանի Վեդիի նստավայրում կորոնավիրուսի 6 դեպք է հաստատվել, ևս երեք դեպք էլ հաստատվել է Վճռաբեկ դատարանում: Այս մասին Tert.am-ի հետ զրույցում ասաց Դատական դեպարտամենտի ղեկավար Կարեն Փոլադյանը։

«Թե´ Վեդիի դատարանի, թե´ Վճռաբեկ դատարանի վարակված աշխատակիցները մեկուսացվել են հայտնաբերվել և մեկուսացվել է նրանց հետ շփված անձանց շրջանակը»,- ասաց Փոլադյանը՝ հավելելով, որ վարակակիրները դատավորներ չեն:

Հայաստանում մայիսի 28-ի դրությամբ հաստատվել է կորոնավիրուսով վարակման 442 նոր դեպք, վարակվածների ընդհանուր թիվը հասել է 8216-ի:

Ինչպես տեղեկացնում է ՀՀ ԱՆ հիվանդությունների վերահսկման և կանխարգելման ազգային կենտրոնը, մեկ օրում կորոնավիրուսի հետևանքով մահացել է 15 քաղաքացի, մահացածների թիվը 113 է:

Մեկ օրում կորոնավիրուսով վարակված պացիենտների՝ այլ հիվանդությունից մահվան դեպք չի գրանցվել, սակայն, ընդհանուր առմամբ, մահվան նման դեպքերի թիվը 44 է:

Մեկ օրում առողջացածների թիվը 32 է, ընդհանուր առողջացածներինը՝ 3287, փաստացի բուժվողներինը՝ 4772 (մեկ օրում ավելացել է 395-ով): Մեկ օրում թեստավորվել է 1253 մարդ, ընդհանուր առմամբ առ այսօր թեստավորվել է 54931 քաղաքացի:

Առողջապահության նախարարությունից հայտնում են, որ մահացած 15 պացիենտներից ամենատարեցը 92 տարեկան է, երիտասարդը՝ 43։