Արցախի «ընտրված ներկայացուցիչներ» ասելը դավաճանություն է․ Միհրդատ Մադաթյանը. Տեսանյութ

Օրերս Սյունիքում տեղի ունեցած միջադեպը շատ անսպասելի հանգուցալուծում ստացավ՝ վերջում գովաբանում էին ոստիկանությանը, իսկ մինչ այդ պախարակում՝ ծեծուջարդի մեջ մեղադրելով։ Այս մասին Արմնյուզ ՀԸ Անժելա Թովմասյանի՝ «Հայելու առաջ» հեղինակային հաղորդման ժամանակ ասել է Վաղինակ Սաքոյանը։

Ըստ ազատամարտիկի՝ եթե այդ գործողությունները սցենարով գրված էին, ապա շատ վատ սցենար էր․ «Լարվածությունը կար բուն բնակիչների մեջ, ովքեր եկել էին այդտեղ՝ չիմանալով ինչ է կատարվել»։

Հաղորդման մյուս հյուրի՝ ազատամարտիկ Գառնիկ Առաքելյանի խոսքով՝ Սյունիքում տեղի ունեցածը Նիկոլ Փաշինյանի «սարքածն էր»․ «Ես անձամբ Կապանում կանգնած մի քանի տղաների զանգել եմ, ասել՝ եթե պետք է Գորիսից կարող են տղաներ միանալ։ Ես ինսունականներից ընդդիմադիր եմ եղել Լևոն Տեր-Պետրոսյան-Նիկոլ Փաշինյան զույգին։ Ու կարծում եմ՝ այդ իրադարձությունները եղել են շոու»։

Շարունակելով խոսքը՝ Գառնիկ Առաքելյանը չի հասկանում՝ ինչին է սպասում ընդդիմադիր գործիչները․ «Տղե՛րք, ինչի՞ն եք սպասում՝ այս իշխանությունը հողերը հանձնի՞, թե՞՝ կորոնավիրուսն է Ձեզ պահում»։

Դիտարկմանը, որ վարչապետն ասում է՝ սուտ են ասում, ոչ ոք Արցախը չի հանձնում, Գառնիկ Առաքելյանը նշել է․ «Այդ դեպքում թող Նիկոլ Փաշինյանը Սերժ Սարգսյանի, Ռոբերտ Քոչարյանի նման կանգնի, ասի՝ մի սանտիմետր չենք հանձնելու»։

Հոգեբան Միհրդատ Մադաթյանն էլ հիշեցնում է ԵԿՄ ղեկավար, պատգամավոր Սասուն Միքայելյանի խոսքը, երբ վերջինս նշել էր, որ երկու տարի առաջ Հայաստանում տեղի ունեցած հեղափոխությունը շատ ավելի կարևոր էր, քան՝ արցախյան պատերազմը․ «Այս հայտարարությամբ Սասուն Միքայելյանը լեգիտիմացրել է Նիկոլ Փաշինայնի ու այս իշխանության բանակից փախածների քայլը։ Ստացվում է՝ այս մարդիկ ճիշտ են արել, որ չեն ծառայել, այսօր Գյումրիից ոտքով հասել են Երևան ու իշխանություն դարձել»։

Վաղինակ Սաքոյանի խոսքով էլ՝ այս տարիներին թաքնված տոտալ աշխատանք է տարվել ազատամարտիկներին պառակտելու համար․ «Ազատամարտում Արցախի հարցը լուծել ենք՝ զենքի ու արյան գնով։ Մենք շատ քիչ արյուն ունենք, բայց բավականին շատ ենք տվել»։

Հարցին՝ այդ դեպքում ի՞նչ է նշանակում վարչապետի՝ Արցախի «ընտրված ներկայացուցիչներ» արտահայտությունը, Վաղինակ Սաքոյանը պատասխանել է․ «Երկրի լիդեր դառնալու համար որոշակի առումով մարդ պետք է քաղաքական ու պետական բովով անցնի։ Նիկոլ Փաշինյանն ի՞նչ է տեսել պատերազմից, կամ այսպես ասած բանակցություններից։ Արցախի հարցը լուծված է։ Բարի եղեք նստեք կլոր սեղանի շուրջ, որոշեք Արցախի կարգավիճակը»։

Հոգեբան Միհրդատ Մադաթյանը համակարծիք է ազատամարտիկի հետ և ավելացնում է․ «Արցախը հանրապետություն է և ունի նախագահ։ Այս հանրապետությունը կա քսան տարուց ավել, որը ստեղծվել է մեր ընկերների արյունով։ Արցախի նախագահին հավասարեցնել ադրբեջանցի ինչ-որ ներկայացուցչի հետ, որն Ադրբեջանում Արցախն է ներկայացնում, սա դավաճանություն է»։

Միհրդատ Մադաթյանը համոզված է, որ այս արտահայտությունը Նիկոլ Փաշինյանը միտումնավոր է արել։