Ապօրինի գույքի բռնագանձման օրենքն առաջինը վերաբերում է «Իմ քայլը» խմբակցությանը՝ Ալեն Սիմոնյանին, Սասուն Միքայելյանին, Անդրանիկ Քոչարյանին, Ռուբեն Ռուբինյանի ընտանիքին. Գևորգ Գորգիսյան. Տեսանյութ

Ապօրինի գույքի բռնագանձման օրենքը չեմ հասկանում, թե ինչ կապ ունի մեզ հետ, այն առաջին հերթին «Իմ քայլը» խմբակցությանն է վերաբերում՝ նույն Ալեն Սիմոնյանին, նրա կնքահորը, Սասուն Միքայելյանին, Անդրանիկ Քոչարյանին, Ռուբեն Ռուբինյանի ընտանիքին:

Այս մասին Tert.am-ի հետ զրույցում ասաց ԱԺ «Լուսավոր Հայաստան» խմբակցության պատգամավոր Գևորգ Գորգիսյանը՝ անդրադառնալով «Իմ քայլը» խմբակցության պատգամավոր Ռուբեն Ռուբինյանի հայտարարությանը, որ ԼՀԿ-ն նախկին իշխանության հետ վերջին շրջանում գործում է նույն տրամաբանության մեջ, այդ մասին խոսում է նաև ապօրինի գույքի բռնագանձման օրենքի քվեարկությունը, որին ԼՀԿ-ն կողմ չի քվեարկել:

Գևորգ Գորգիսյանի ներկայացմամբ՝ «Իմ քայլը» խմբակցության կեսից ավելին կամ եղել է 90-ականների «թալանչի ռեժիմի մաս», կամ ՀՀԿ-ի իշխանության ժամանակ է եղել «թալանչի ռեժիմի մաս»:

«Երբ քաղաքացիներն ատում էին Հանրապետական կուսակցությանը, ոչ թե ատում էին օրինակ՝ Արա Բաբլոյանին, այլ այն օլիգարխներին, որոնք ամբարտավան էին, այն պատգամավորներին, որոնք ընդդիմության հետ խոսում էին հեգնանքով, որոնք ասում էին՝ մենք շատ ենք, ուրեմն ճիշտ ենք, մեր դեմ խաղ չկա: Այս մոտեցումներն են, որ քաղաքացիները գնացին մերժելու՝ Սերժ Սարգսյանի հետ մեկտեղ: Բայց եթե պիտի Սերժ Սարգսյանը հեռանա, ու նույն գործողությունները շարունակեն իրենց պատգամավորները, նույնպես շարունակեն լինել ամբարտավան, Սասուն Միքայելյանը սեփականաշնորհի Հրազդանի կեսը կամ ավելին, նշանակում է՝ անհասկանալի է դառնում, թե ինչու այդ ամբողջը տեղի ունեցավ: Քաղաքացիներն իրավունք ունեն դժգոհություններ արտահայտելու, հիասթափվելու այդ ամենից»,- ասաց նա:

Գևորգ Գորգիսյանն անդրադարձավ նաև Էդմոն Մարուքյանի հայտարարությանը, թե իրենց տեսնում են հաջորդ իշխանություն: Գորգիսյանի դիտարկմամբ՝ այդ ուղղությամբ ամեն օր աշխատում են և զարմանում են, որ զարմացողներ կան: Ըստ նրա՝ Նիկոլ Փաշինյանը ևս հասկանում է, որ քաղաքացիները կարող են ասել՝ ինչո՞ւ ոչ:

Մանրամասները՝ տեսանյութում: