Վարչապետի ու նախարարի իրարամերժ հայտարարությունների պատճառով՝ ժողովուրդն այլևս ուշադրություն չի դարձնում կորոնավիրուսի թվերին․ բժիշկ. Տեսանյութ

Իրականում մարդկանց այլևս չի հետաքրքրում թե կորոնավիրուսով քանիսն են վարակվել, քանիսը՝ բուժվել։ Այս մասին Անժելա Թովմասյանի՝ «Արմնյուզ» ՀԸ «Հայելու առաջ» հեղինակային հաղորդաշարի ժամանակ ասել է բժիշկ «COVID-Փաստահավաք խմբի» անդամ Գևորգ Գրիգորյանը։

Ըստ բժշկի՝ պատճառը ինֆորմացիոն խառնաշփոթն էր. «Բազմաթիվ անգամ հրապարակված թվերն իրականությանը չէին համապատասխանում, ինչի արդյունքում ժողովուրդը կորցրեց իր վստահությունը»։

Գևորգ Գրիգորյանի խոսքով՝ մարդիկ այսօր կգերադասեն կորոնավիրուսով վարակվել ու երկու շաբաթում բուժվել, քան ամիսներ շարունակ սոցիալական խնդիրներով տանը փակված մնալ. «Եկեք ընդունենք՝ պետության կողմից տրամադրվող սոցիալական աջակցություններն ու հանձն առած ծրագրերը ծրագրեր չեն»։

Բժշկի դիտարկմամբ՝ այլևս անիմաստ է մարդկանց տներում փակելը․ «Մարդիկ անլուրջ են վերաբերվել Պարետի կողմից սահմանված արգելքներին։ Կոչեր կարող են անել հասարակական կազմակերպության ներկայացուցիչները, բայց պետությունը պետք է կարողանա մարդկանց տանը պահել»։

Գևորգ Գևորգյանը բերում է քաղաքակիրթ երկրների օրինակը, համաձայն որի՝ այդ պետություններն արտակարգ դրության պայմաններում ամբողջ գործիքակազմով սահմանում են վերահսկողություն․ «Հայաստանում վերահսկողություն էին սահմանում ինչ-որ թերթիկի միջոցով։ Մեզանից յուրաքանչյուրը կարող էր թերթիկի վրա գրել՝ գնում է դեղատուն, բայց գնալ ընկերոջ տուն»։

Դիտարկմանը՝ վարչապետը փորձում է հանրությանը հանգստացնել, իսկ Առողջապահության նախարարն այլ բան է ասում, բժիշկը նշել է․ «Երբ նախարարն ասում էր՝ ես իմ երեխաներին վաղը դպրոց եմ ուղարկում, հաջորդ օրը ԿԳՄՍ նախարարն ասում էր՝ դպրոցները փակվում են ու այսպիսի բազում իրարամերժ հայտարարություններ են եղել»։

Գևորգ Գևորգյանի խոսքով՝ հենց այս իրարամերժ հայտարարությունները պատճառ դարձան, որ ժողովուրդն այլևս ուշադրություն չդարձնի դրանց․ «Այսօր մեկ նավի մեջ են Պարետ Տիգրան Ավինյանն ու Արսեն Թորոսյանը, և, եթե Պարետին ազատեն պաշտոնից, դրան հետևելու է նաև Արսեն Թորոսյանի հեռանալը»։

Գևորգ Գրիգորյանը հռետորական հարց է բարձրացնում՝ ինչպե՞ս է ստացվում, որ Վրաստանում քիչ են վարակակիրները. «Կա երկու տարբերակ՝ կա՛մ մեզ մոտ թվերն ուռճացնում են, ուրեմն պետությունը խաբում է ժողովրդին, կա՛մ էլ թվերը չեն չափազանցնում, ինչը նշանակում է՝ պետական այրերն իրենց տեղում չեն»։

Հարցին՝ Ձեր կարծիքով ո՞ր տարբերակն է մեզ մոտ, բժիշկը պատասխանել է․ «Իմ տեսակետը երկուսը մեկում է, այսինքն՝ թվերի կեսով ունենք վարակվածներ, բայց միևնույն ժամանակ պետական պաշտոնյաներն իրենց տեղում չեն»։

Մանրամասները՝ Tert.am - ի տեսանյութում