«Լուսավորը» դեռ հրաժարական չի պահանջում. «Փաշինյանի ռեյտինգը դեռ բարձր է. պետք է համբերել»
«Հրապարակ» թերթը գրում է. «Էդմոն Մարուքյանը, որը ցած չի իջնում լրատվամիջոցներից, սակայն իշխանական եւ արեւմտյան ԶԼՄ-ներին է նախապատվություն տալիս, երեկ մեր հարցին, թե անվստահություն կհայտնի՞ ԼՀԿ-ն Նիկոլ Փաշինյանին, 10 անգամ կրկնեց` չի լսվում-չի լսվում, անջատեց հեռախոսը եւ դարձավ անհասանելի:
Փաշինյանի հետ տարաձայնություններ ունեցող ԼՀԿ-ն սինխրոն է նրա ղարաբաղյան մոտեցումների հետ եւ անգամ հայտնի «ծեծից» հետո չի պատրաստվում անվստահություն հայտնել Փաշինյանին։ «Նման հարց օրակարգում չի եղել, չկա»,- ասաց պատգամավոր Տարոն Սիմոնյանը:
«Արտահերթ ընտրություններ կարող են լինել մի դեպքում՝ եթե խորհրդարանն ի վիճակի չլինի իր առջեւ դրված խնդիրները լուծել. մենք համաձայն չենք առանձին գործընթացների հետ, բայց դեռեւս դա չի նշանակում, որ մենք գտնում ենք` ԱԺ-ն իր լիազորությունները չի կատարում»:
Դեռ որքա՞ն եք «ծեծվելու»։ «Ցույց կտա ժամանակը»: Ի դեպ, մեկ այլ ԼՀԿ-ական էլ ասաց. «Կարելի է ինչ-որ փուլում կազմակերպել, այսպես ասած` խորհրդարանական վարչապետափոխություն, 88 հոգու մեջ հաստատ կգտնվեն մարդիկ, որոնք կաջակցեն այդ պրոցեսին, սակայն պետք է հաշվի առնել շատ կարեւոր հանգամանք` Նիկոլ Փաշինյանի ռեյտինգը ժողովրդի մեջ դեռ բարձր է, եւ գործընթացը չի տա այն էֆեկտը, որն անհրաժեշտ է։ Ժողովրդի մեջ ափսոսանք կմնա Փաշինյանի ապավարչապետացումից, ուստի պետք է համբերել»:
Մանրամասները՝ թերթի այսօրվա համարում։
Հետևեք մեզ Facebook-ում