Ձեզ մաղթում եմ անդադար թեստավորում, տնական օղիների անսպառ պաշար և պինցետների լայն տեսականի. այլևս Ձեր՝ COVID-19

Մեծարգո վարչապետ,

Իմ և իմ մեծ ընտանիքի անունից ցանկանում եմ խորին շնորհակալությունս և երախտագիտությունս հայտնել Ձեզ և Ձեր կառավարությանը Ձեր երկրում ինձ համար նման նպաստավոր պայմաններ ստեղծելու առնչությամբ:

Այն ժամանակ, երբ ամբողջ աշխարհը, միջոցների մեջ խտրականություն չդնելով, պայքարում է իմ դեմ, զրկելով ինձ կյանքի իրավունքից, սահմանափակելով ազատ արտահայտվելու իմ հնարավորույթունները, խոչընդոտելով իմ ազատ տեղաշարժի ազատությունը, Ձեր հմուտ և հպարտ առաջնորդության շնորհիվ Հայաստանը դառնում է իմ երկրորդ հայրենիքը, որտեղ ես ինձ, հիրավի, ազատ և պաշտպանված եմ զգում:

Այս ամենը հնարավոր չէր լինի առանց 2018 թվականի ոչ բռնի, թավշյա, ժողովրդական հեղափոխության, քանզի հակառակ պարագայում ես նախորդ իշախանությունների վիրուսարբու էության զոհը կարող էի դառնալ:

Շարունակեք Ձեր անձնվեր գործունեությունը հանուն երկրագնդի վրա գոյություն ունեցող բոլոր կենսաբանական տեսակների կյանքի իրավունքի: Այդ կենսաբազմազանությունը պետք է դառնա Հայաստանի Հանրապետության այցեքարտը, հատկապես՝ արտաքին քաղաքականության ոլորտում:

Ձեզ մաղթում եմ անդադար թեստավորում, տնական օղիների անսպառ պաշար և պինցետների լայն տեսականի:

Խորին վիրուլենտությամբ, բարձր ջերմությամբ, հազով և հևոցով,

Այլևս Ձեր՝ COVID-19

Արմեն Աշոտյանի ֆեյսբուքյան էջից