Առաջարկվում է դատավորների աշխատավարձը այս տարի բարձրացնել 50, եկող տարի՝ 60, իսկ 2022թ.՝ 70 տոկոսով. արդյունքում՝ աշխատավարձը 2020թ. կկազմի 991 000. Ռուստամ Բադասյան. Տեսանյութ

ՀՀ վարչապետ Նիկոլ Փաշինյանն ու Արդարադատության նախարար Ռուստամ Բադասյանը վարչապետի ֆեյսբուքյան էջի ուղիղ եթերում քննարկեցին վեթինգի իրականացման գործընթացը և ապօրինի գույքի բռնագանձման կարգավորումները: Այս մասին տեղեկացնում է Tert.am-ը:

Պաշտոնյաները ներկայացրին, թե ինչ փոփոխութուններ են ենթադրվում դատական համակարգում՝ Դատական օրենսգրքի փոփոխությունների՝ ուժի մեջ մտնելուց հետո և ինչքանով են համոզված, որ այդ փոփոխությունների արդյունքում էականորեն փոխվելու դատական համակարգի որակն, ու համակարգում միայն բարձրորակ դատավորներն են լինելու համակարգում:

Վարչապետի հարցին՝ ինչպե՞ս են ազատվելու «վատ» դատավորներից, Բադասյանը պատասխանեց, թե ավելի կարևոր է ոչ թե այն, թե ով է լքելու դատական համակարգը, այլ՝ ով է համալրելու, իսկ դրա համար պետք է ստեղծվեն պայմաններ, որ դատական համակարգում աշխատելը գրավիչ լինի:

«Մենք ունենք 244 դատավոր, որոնցից՝ 183-ը՝ Առաջին ատյանի, 44-ը՝ Վերաքննիչ, 17-ը՝ Վճռաբեկ դատարանում: Վերջին երկու տարում թեստավորման փուլը հաղթահարել են 30 անձ, որոնց մի մասը դեռ ուսումնառությունը չի ավարտել, ինչը շատ ցածր թիվ է: Որպեսզի դատական համակարգը մասնագետների համար գրավիչ լինի, առաջին պայմանը արժանի վարձատրությունն է, ինչի ուղղությամբ քայլեր նեն կատարվել: Դատական դեպարտամենտը նաև մեր հորդորով ներկայացրել է միջնաժամկետ ծախսային ծրագրերով դատավորների վարձատրության ավելացման աստիճանական համակարգ, որը ենթադրում է, որ 2020թ. դատավորների աշխատավարձը կբաևձրանա 50 տոկոսով, եթե կառավարության կողմից ընդունվի, 2021թ.՝ 60 տոկոսով, 2022թ.՝ 70 տոկոսով»,-ասաց նախարարը:

Նա ներկայացրեց, որ այսօր Առաջին ատյանի դատավորի աշխատավարձը կազմում է շուրջ 661 000 դրամ, Վերաքննիչ դատարանի դատավորինը՝ 727 000, Վճռաբեկինը՝ 760 հազար, և եթե 2020թ. աշխատավարձի բարձրացումը տեղի ունենա, ապա 2020թ. կկազմի 991 000, 2021թ.՝ 1 միլիոն 57 հազար դրամ, 2022թ.՝ 1 միլիոն 123 հազար դրամ:

Վարչապետն արձագանքեց՝ աշխատավարձի թեման նուրբ թեման է, մանավանդ՝ սոցիալական ծանր վիճակի պայմաններում այն որոշակի տարակուսանքի տեղիք է տալիս.

«Բայց դատավորների աշխատավարձի բարձրացումն արվում է ոչ այնքան դատավորների համար, այլ այն բազմահազար քաղաքացիների համար, ովքեր այսօր վարչապետին, նախարարին, կառավարությանը դիմում են՝ ասելով, թե դատարանում անարդար ձևով են լուծվել իրենց հարցերը»,-ասաց նա:

Հաջորդ քայլը, ըստ նախարարի, թվայնացման գործընթացի արագացումն է: