Մինչև վերջ կանգնելու ենք նրա իրավունքների պաշտպանության համար. Սեյրան Օհանյանը Սամվել Բաբայանի մասին. Տեսանյութ

-Քաջ ծանոթ լինելով Հոգևոր Հայաստանի գործունեությանը և Հայքի ծրագրերին մենք այսօր, կարծես թե, այստեղ բարձրացրեցինք մեր բանականության աստիճանը, աշխարհահայացքը, և հետադարձ հայացք հայացք գցելով մեր անցած ճանապարհին ևս մեկ անգամ պարտավորվեցինք մեր աշխարհայացքն ուղղել աշխարհասփյուռ հայությանը, որը Հայաստանն ընդունելով որպես հոգևոր կենտրոն պետք է կառուցի հայի հոգևոր ապագան, - ասաց «Օհանյան-Րաֆֆի-Օսկանյան» դաշինքի անդամ, գեներալ-լեյտենանտ Սեյրան Օհանյանը, ելույթ ունենալով «Հոգևոր Հայաստան» նախաձեռնության՝ «Ամեն մի գիշեր ունի լուսաբաց» խորագրով համաժողովին:

- Չի կարող լինել հոգևոր գործունեություն և նվիրվածություն, եթե արդյունքում չկա արդարությունը, չկան նորմալ մարդկային հարաբերություններ, որոնք որ հիմք են հանդիսանում և յուրաքանչյուր կոլեկտիվի բարոյահոգեբանական մակարդակի, և յուրաքանչյուր անհատի մարտական հոգու: Վերլուծելով այսօրվա իրականությունը մենք տեսնում ենք որքան բացեր կան արտահայտված տարբեր արատավոր երևույթներով, տարբեր արատավոր գործունեությամբ, որը նաև մեկընդմերթ նախընտրական ժամանակահատվածում արտահայտվում է տարբեր բացթողումներով ու տարբեր կոպիտ սխալներով ուղղված մեր ժողովրդի հանդեպ: Եթե տարիներ ի վեր մարդիկ գործել, կամ գործում են, կամ պատրաստվում են գործել բաժանիր, որ տիրես սկզբունքով, այսօր մեր իրականության մեջ այս նախընտրական շրջանում երկրորդ բաժանիր, որ տիրես սկզբունքն է գործում՝ դրամ բաժանելով ժողովրդին՝ այսպես ստորացնելով ժողովրդին, և այդ ամենի ակունքներում մենք պետք է տեսնենք առկա արատավոր երևույթները, - նշեց ՀՀ ՊՆ նախկին նախարար Սեյրան Օհանյանը, հավելելով, որ դրան դիմագրավելու համար անհրաժեշտ է համախմբվել:

- Ամենակարևոր հենքը համախմբումն է, միասնությունը... միայն այդ կերպ մեր երկիրը՝ որպես աշխարհաքաղաքական օբյեկտ դարձնել ավելի ամուր հստակ սուբյեկտ իրականացնելով միջոցառումներ և ազգային երաշխիքների ձևավորման, և միջազգային երաշխիքների ձևավորման, որոնք կբարձրացնեն մեր երկրի վարքն ու արժեքները:

Սեյրան Օհանյանն անդրադարձավ նաև Սամվել Բաբայանին:

- Արատավոր երևույթները շարունակվում են նաև դաշինքի նկատմամբ՝ տարբեր բռնություններ, ստիպողական գործողություններ, Ջրառատի գործողությունը և վերջին արտահայտումը Սամվել Բաբայանի ձերբակալումն էր, չհասկանալով, որ նա մեր մարտական ընկերն է, մեր գաղափարակիցը, և Սամվել Բաբայանի գործունեության ժամանակ նա Արցախյան ազատամարտում իր ընկերների հետ հաղթանակ է ապահովել: Եւ դրա համար Արցախի ժողովուրդը նրան շնորհել է հերոսի կոչում:

Ձեր ներկայությամբ ուզում եմ ասել, որ մենք մինչև վերջ կանգնելու ենք նրա իրավունքների պաշտպանության համար և այս իշխանություններին թույլ չենք տալու, որ շինծու գործունեությամբ հասնեն իրենց վերջին նպատակին:

zham.am