Հայաստանի իշխանություններն ամրապնդում են դաշնակցական կապերն Ադրբեջանի հետ

Հայաստանի իշխանությունները շարունակում են ուրախացնել թշնամուն: Հիշում եք չէ՞ հանրապետականների այն հայտնի թեզը, թե իբր գործող իշխանությունների դեմ բողոքները «թշնամին տեսնում՝ ուրախանում է»: Նախ ասեմ, որ Ալիևի համար ավելի լավ դաշնակից Հայաստանի Հանրապետության և Արցախի դեմ պայքարի գործում, քան Սերժ Սարգսյանն ու ՀՀԿ-ն է դժվար է գտնել: Նույնիսկ Թուրքիան է ավելի քիչ վնաս տվել Հայաստանի Հանրապետությանը, քան Սերժ Սարգսյանը:

Հիմա էլ, երբ իշխանությունները ձերբակալեցին Ադրբեջանի ոխերիմ թշնամի Սամվել Բաբայանին, Ադրբեջանում իսկական համազգային տոն է: Գուցե, շուտով այդ օրը նաև պետական տոների ցանկում ընդգրկվի Ադրբեջանում:

Երբ Ալիևը պարգևատրեց Բելառուսի նախագահ Ալեքսանդր Լուկաշենկոյին, նա խոստացավ, թե «տեղը կհանի» և գործով արժանի կդառնա այդ շքանշանին: Եվ նա այդ մեդալը «վաստակեց» բլոգեր Լապշինին ձերբակալելով ու Ադրբեջանին հանձնելով: Ժամանակին նաև Ալիևը՝ բարձր գնահատելով Սերժ Սարգսյանի դերը Հայաստանի դեմ պայքարի գործում, ասել էր, որ Հայաստանի իշխանությունները Ադրբեջանի լավագույն դաշնակիցն են: Հիմա մտածում եմ, կարո՞ղ ա Ալիևի այդ բարձր գնահատականի «տեղը հանելու» համար Հայաստանի իշխանությունները Սամվել Բաբայանին արտահանձնեն Ադրբեջանին:

Հրանտ Ենոքյանի ֆեյսբուքյան էջից