«Ադրբեջանին և Թուրքիային հարկավոր է մեր տունն՝ առանց մեզ». Արման Աբովյան

«Արցախ... Վստահ եմ, որ արցախա-ադրբեջանական հակամարտության լուծումը չի կարող երկիմաստ մեկնաբանվել: Ես հասկանում եմ, որ դիվանագիտությունը հաճախ լղոզում է տերմինները, և դա նորմալ է, սակայն կան իրավիճակներ, երբ անհրաժեշտ է հստակ և հասկանալի արտահայտել սեփական դիրքորոշումը:

Հայկական կողմի դիրքորոշումը, ավելի ճիշտ՝ բանակցությունների հիմքը պետք է լինի մեկը՝ համաշխարհային հանրության կողմից Արցախի Հանրապետության փաստացի կարգավիճակի իրավական լեգիտիմացումը, և հենց այդ հիմքի վրա է, որ մենք պետք է կառուցենք մեր դիրքերը: Արցախի անկախության միջազգային իրավական լեգիտիմացումից հետո Արցախի Հանրապետությունը կարող է յուրաքանչյուր կողմի հետ քննարկել ցանկացած հարց:

Այլ տարբերակները հղի են իրադարձությունների շատ վտանգավոր զարգացումով:

Պարզապես պետք է ընդունենք, որ Ադրբեջանը չի ցանկանում և չի գնա հարցի քաղաքակիրթ լուծմանը: Ադրբեջանին արցախյան հիմնախնդրի լուծում պետք չէ, ինչպես և իր ավագ եղբորը` Թուրքիային, հարկավոր է մեր տունն՝ առանց մեզ: Եվ հենց որ մենք սա հասկանանք և ընդունենք, ամեն ինչ իր տեղը կընկնի»:

Արման Աբովյանի ֆեյսբուքյան էջից