Եվրոպական մի շարք երկրներում արձանագրվել են COVID-19-ից մահվան ամենաքիչ դեպքերը

Ֆրանսիայում, Իտալիայում և Իսպանիայում արձանագրվել են վերջին շաբաթների ընթացքում կորոնավիրուսից մահվան ամենաքիչ դեպքերը։ Դրական տեղաշարժի ֆոնին այդ երկրները կարանտինային ռեժիմի տարբեր մեղմացումների են դիմել։

BBC-ի ռուսական ծառայության փոխանցմամբ՝ Ֆրանսիան հաղորդել է մահվան 135 դեպքի մասին, Իսպանիան՝ 164, Իտալիան՝ 174։

Մեծ Բրիտանիայում 24 ժամվա ընթացքում կորոնավիրուսից մահացել է 315 մարդ։ Բրիտանիայի իշխանությունները հաղորդում են, որ հիվանդության պիկն անցել է․ ավելի քիչ մարդիկ են հոսպիտալացման կարիք ունենում։

Լրատվամիջոցը նաև հաղորդում է, որ եվրոպական երկրների ղեկավարները խոստացել են 7,5 մլրդ եվրո հավաքել կորոնավիրուսի դեմ պատվաստանյութի մշակման համար։ Այսօր այդ նախաձեռնությանը նվիրված միջազգային օնլայն համաժողով կանցկացվի։ Համաժողովի համանախագահները կլինեն Մեծ Բրիտանիան, Կանադան, Ֆրանսիան, Գերմանիան, Իտալիան, Ճապոնիան, Նորվեգիան, Սաուդյան Արաբիան և Եվրոպական հանձնաժողովը։

Բրիտանիան ուսումնասիրությունների համար կհատկացնի 338 մլն ֆունտ։ Միևնույն ժամանակ Դոնալդ Թրամփը հայտարարել է, որ ԱՄՆ-ում կորոնավիրուսի դեմ պատվաստանյութը պատրաստ կլինի արդեն այս տարվա վերջին։

Zham.am