Մի բան հստակ է՝ այդ թատրոններով հանրության ուշադրությունը երկար ժամանակ չեն կարողանալու շեղել և մի փուլում արդեն անցնելու են «Բ» պլանին՝ առաջնագծին

Ուզում եմ նշել, որ սա ոչ թե "haqqin.az" կամ այլ` "ճ" կլասի կայքում տեղադրված հոդվածի վերնագիր է, այլ Ադրբեջանի պաշտպանության գերատեսչության պաշտոնական կայքէջում տեղադրված մամուլի հաղորդագրության վերնագիր։ Այս հայտարարությունը Զաքիրն արել է այսօր, զինված ուժերի Կենտրոնական հրամանատարական կետում տեղի ունեցած ծառայողական խորհրդակցության ժամանակ։

Վերջին ամիսներին` հատկապես ապրիլին, Ադրբեջանի զինված ուժերը բավականին ակտիվացել են։ Բացի այն, որ զինանոցում առկա բոլոր զինատեսակներով գրեթե ամեն օր զորավարժություններ են անցկացնում` բոլոր զորատեսակների ներգրավմամբ, լարվածության աճ է նկատվում նաև առաջնագծում։

Պաշտպանության բանակի մամլո հաղորդագրություններից հայտնի է դարձել, որ ապրիլ ամսին թշնամին հրադադարի պահպանման ռեժիմը խախտել է ավելի քան 830 անգամ՝ տարբեր տրամաչափի հրաձգային զինատեսակներից մեր դիրքերի ուղղությամբ արձակելով շուրջ 9000 կրակոց: Համեմատության համար` մարտ ամսին` 790 խախտում/ 6800 կրակոց, փետրվարին`655 խախտում/4900 կրակոց, հունվարին` 665 խախտում/3800 կրակոց։ Բացի այդ` ապրիլի 21-ին հարավային ուղղությամբ տեղակայված հակաօդային պաշտպանության ստորաբաժանումները խոցել են թշնամու "Orbiter" տիպի անօդաչու թռչող սարք, իսկ ապրիլի 29-ին՝ արևելյան (Մարտունի) հատվածում տեղակայված մարտական դիրքերի ուղղությամբ ադրբեջանական զինուժը կիրառել է 60 մմ ականանետեր։

Ադրբեջանում հիմա վիճակը շատ լուրջ է` նավթի գների կտրուկ անկում և դրա հետ կապված երկրում ստեղծված ծանր սոցիալ-տնտեսական վիճակ, կորոնավիրուսի հետ կապված կատաստրոֆիկ վիճակ, քաղբանտարկյալների հարց և այլն.. Հասարակության ուշադրությունը ներքին խնդիրներից շեղելու համար Ադրբեջանում հիմա ինչ-որ շոուներ են անցկացնում` Գլխավոր դատախազ են փոխում, տարբեր շրջանների գործադիր իշխանությունների պաշտոնյաների նկատմամբ քրեական գործեր են հարուցում, ձերբակալություններ են իրականացնում և այլն։ Մի բան հստակ է` այդ թատրոններով հանրության ուշադրությունը երկար ժամանակ չեն կարողանալու շեղել և մի փուլում արդեն անցնելու են «Բ» պլանին` առաջնագծին։

Ալեն Ղուլյանի ֆեյսբուքյան էջից