Բժիշկները պատրաստվում էին հայտնել մահվանս լուրը․ Բորիս Ջոնսոն

Մեծ Բրիտանիայի վարչապետ Բորիս Ջոնսոնը պատմել է, թե ինչպես է պայքարել  կորոնավիրուսի դեմ։ The Sun-ի հետ հարցազրույցում 55-ամյա Ջոնսոնը հայտնել է, որ բժիշկները պատրաստվում էին հայտարարել իր մահվան լուրը, երբ նա դեռ վերակենդանացման բաժանմունքում էր։ Նրա խոսքերով՝ բժիշկները չէին հավատում, որ նա կբուժվի։ Հատուկ պլան էր մշակվել այն դեպքի համար, եթե նա մահանար։

«Դժվար էր հավատալ, որ ընդամենը մի քանի օրում վիճակս կարող էր այդ աստիճան վատթարանալ։ Հիշում եմ հիասթափության զգացումս։ Ես չէի կարող հասկանալ, թե ինչու չեմ ապաքինվում»,- ասել է Ջոնսոնը։

Նրա խոսքերով՝ «լիտրերով թթվածին է ստացել», իրավիճակը ծայրահեղ ծանր էր, բայց չէր հավատում, որ կմահանա։

Հիշեցնենք, որ Ջոնսոնի մոտ կորոնավիրուս էր հայտնաբերվել մարտի 27-ին։ Նրա վիճակն օր օրի վատացել էր, ինչի հետևանքով նա ապրիլի 5-ին հոսպիտալացվել էր։ Երեք օր վերակենդանացման բաժանմունքում էր անցկացրել, և ապրիլի 12-ին դուրս գրվել հիվանդանոցից։

Zham.am