Քաղաքապետի տեղակալի ու խորհրդականի տպավորիչ պարգևավճարները

Ղեկավարվելով ՀՀ Աշխատանքային օրենսգրքի 219-րդ հոդվածի 1-ին մասի 2-րդ կետով և հաշվի առնելով Երևանի քաղաքապետի տեղակալ Հայկ Սարգսյանի և քաղաքապետի խորհրդական Կարեն Համբարձումյանի կողմից աշխատանքային և ծառայողական պարտականությունները բարեխղճորեն և բարձր որակով կատարելու հանգամանքը.

1. Երևանի քաղաքապետի տեղակալ Հայկ Սարգսյանին և քաղաքապետի խորհրդական Կարեն Համբարձումյանին խրախուսել դրամական պարգևատրմամբ 1800,0-հազարական /մեկ միլիոն ութ հարյուր հազար/ դրամի չափով՝ Երևան քաղաքի 2020թ. բյուջեով նախատեսված պարգևատրման ֆոնդի հաշվին:

Հաղորդում է 168.am-ը Երևանի քաղաքապետարանի պաշտոնական կայքին հղելով։ 

Ի դեպ, ուշագրավ է, որ քաղաքապետի խորհրդական Կարեն Համբարձումյանը, ով շուտով կպաշտոնավարի՝ արդեն որպես Վերաքննիչ քաղաքացիական դատարանի դատավոր, ապրիլ ամսին արդեն 2-րդ անգամ է պարգևատրվում:

Ապրիլի 6-ին նա պարգևատրվել է 560.000 դրամով: Փաստորեն, մեկ ամսվա մեջ, 14 օրվա տարբերությամբ, այս պաշտոնյան պարգևատրվել է 2 մլն 360.000 դրամ գումարով:

Ինչ խոսք, տպավորիչ գումարներ են, և հավատում ենք, որ այդ պաշտոնյաները միգուցե արժանի են այդ գումարներին, բայց ֆիքսենք մի բան` երկրում, փաստորեն, փող կա, կամ փող կա միայն ահռելի պարգևավճարների համար: