ՀՀ մշակույթի նախարարության և «Լոֆթ» կենտրոնի միջև ստորագրվել է համագործակցության համաձայնագիր
Մարտի 22-ին, ՀՀ մշակույթի նախարարության և «Լոֆթ» կենտրոնի միջև ստորագրվել է համագործակցության համաձայնագիր:
Ըստ համաձայնագրի` մարզային գրադարաններում կիրականացվեն թարմացումներ ու բարեփոխումներ. կմշակվի ոլորտն ակտիվացնելու, գրադարաններում նոր մթնոլորտ ստեղծելու և լրացուցիչ ծառայություններ ներառելու ռազմավարություն:
«Ի՞նչ է նշանակում լրացուցիչ ծառայություններ. դա մոտավորապես այն է, ինչի մասին խուսում էի ամիսներ առաջ՝ իմ պաշտոնավարման սկզբում: Մենք փորձում ենք գրադարանային ծառայությունը դարձնել նաև ընտանեկան ժամանցի ու հանգստի կենտրոն: Նման օրինակներ շատ կան, բայց լավագույն օրինակը մենք գտանք «Լոֆթում», որի հետ գործընկերային քննարկումների արդյուքում և ստեղծվեց այս համաձայնագիրը»,-իր խոսքում նշել է ՀՀ մշակույթի նախարար Ա. Ամիրյանը:
«Մարզային մեր բոլոր գրադարանների մասով ունենք ծրագրեր և ուզում ենք աշխատել: Անշուշտ, մենք բաց ենք նաև այլ կազմակերպությունների հետ համագործակցության առումով: Մեզ կարող են միանալ բոլոր նրանք, ովքեր հետաքրքրված են այս գործով: Հետաքրքիր երկու առաջարկություն արդեն ստացել ենք Ռուսաստանից: Խոսքը Մարտունու և Սևանի գրադարաններն ամբողջությամբ վերանորոգելու, ապա դրանք ընտանեկան հանգստի և ժամանցի կենտրոն-գրադարան դարձնելու մասին է»,-ասաց նախարարը՝ վստահեցնելով, որ ծրագիրն իրականություն կդառնա մոտ ապագայում:
«Միջազգային փորձը փաստում է, որ գրադարանը, որպես միայն գիրք կարդալու տարածք, իրեն փոքր-ինչ սպառել է: Համատեղ ջանքերով պիտի փորձենք է՛լ ավելի հետաքրքիր դարձնել ոլորտը՝ երիտասարդության ու ընտանիքի համար ավելի հարմարավետ միջավայր ստեղծելով»,-ասաց «Լոֆթ» կենտրոնի տնօրեն Արևիկ Համբարձումյանը:
Հետևեք մեզ Facebook-ում