Անգնահատելի է Մարտուն Ադոյանի ավանդը Հայաստանում կինոարդյունաբերության, կինոմիջավայրի ու կինոմշակույթի պահպանման ու զարգացման գործում

65 տարեկանում կյանքից հեռացել է «Մոսկվա» կինոթատրոնի տնօրեն, կինոպրոդյուսեր, մշակույթի գործիչ, Հայաստանի կինեմատոգրաֆիստների միության, Հայաստանի ազգային կինոակադեմիայի անդամ Մարտուն Ադոյանը: 

Մարտուն Ադոյանը ծնվել է Աշտարակի տարածաշրջանի Ուջան գյուղում: Ավարտել է Երևանի պետական տնտեսագիտական համալսարանը:

Աշխատանքային գործունեության ընթացքում 1986-1991 թթ. եղել է ՀՀ կինեմատոգրաֆիայի պետական կոմիտեի վերահսկողության և վերստուգման բաժնի պետ, Հանրապետության կինովիդեո միավորման գլխավոր տնօրենի տեղակալ:

1991 թվականից զբաղեցրել է «Մոսկվա» կինոթատրոնի տնօրենի պաշտոնը:

Մշակույթի ոլորտում ծավալած նրա գործունեությունը հիմնականում վերաբերում է կինոարտադրությանը: Նա եղել է բազմաթիվ ֆիլմերի և հեռուստաֆիլմերի գլխավոր պրոդյուսեր:

Անգնահատելի է Մարտուն Ադոյանի ավանդը Հայաստանում կինոարդյունաբերության, կինոմիջավայրի ու կինոմշակույթի պահպանման ու զարգացման գործում:

Դեռևս 90-ականերից սկսած՝ անկախ Հայաստանում, նա դարձավ նախաձեռնող գործարար ֆիլմերի տարածման և ֆիլմարտադրության ոլորտում: Բազմաթիվ միջազգային համագործակցային կապերի շնորհիվ նա Հայաստանում ապահովել է համաշխարհային վարձույթում առկա լավագույն ֆիլմերի տարածումը, և հայ կինոսիրող հանդիսատեսը հնարավորություն է ունեցել իր համար բացահայտել արտերկրի կինոարվեստը՝ մեծ էկրանին:

Հայաստանի համար ծանրագույն օրերին անգամ նա չի թողել կինոյի առաջնագիծը. Մարտուն Ադոյանի բացառիկ ջանքերով վերապրել են Երևանի «Մոսկվա», Գյումրու «Հոկտեմբեր» կինոթատրոնները: Նրա ջանքերով էր նաև, որ կայացել ու զարգացել են հայկական կինոփառատոները, այդ թվում՝ «Ոսկե Ծիրան» միջազգային կինոփառատոնը՝ ամենածանր պայմաններում անգամ ապավինելով «Մոսկվա» կինոթատրոնի մեծ աջակցությանը:Մարտուն Ադոյանը 2007 թ. արժանացել է ՀՀ մշակույթի նախարարության Ոսկե մեդալի, 2014 թվականին՝ ՀՀ նախագահի պետական մրցանակի, 2015 թվականին՝ ՀՀ մշակույթի վաստակավոր գործչի պատվավոր կոչման, 2016 թվականին պարգևատրվել է Երևանի քաղաքապետի ոսկե մեդալով:

Մարտուն Ադոյանի հոգեհանգիստը ապրիլի 29-ին ժամը 16-ից է քաղաք Երևան, Վերին Անտառային 186/13 հասցեում, վերջին հրաժեշտը՝ ապրիլի 30-ին ժամը 11:00-ից Ուջանում, հուղարկավորությունը՝ ժամը 13-ին:

Zham.am-ը ցավակցում է Մարտուն Ադոյանի ընտանիքին, հարազատներին և ընկերներին: