Նիկոլ Փաշինյանը երբեք չի թաքցրել իր նպատակներն Արցախի տարածքների վերաբերյալ. Գառնիկ Իսագուլյան. Տեսանյութ
Արցախի բանակցային գործընթացի մասին ՌԴ արտգործնախարար Սերգեյ Լավրովի հայտարարությունն աննախադեպ է թե՛ դիվանագիտական, թե՛ քաղաքական առումով: Այս մասին Անժելա Թովմասյանի՝ Արմնյուզ ՀԸ «Հայելու առաջ» հեղինակային հաղորդման ժամանակ ասել է Մարդու իրավունքների առաջին պաշտպան Լարիսա Ալավերդյանը՝ անդրադառնալով:
Հիշեցնենք՝ ապրիլի 21-ին Գորչակովի անվան հանրային դիվանագիտության աջակցության հիմնադրամի կազմակերպած առցանց կլոր սեղանի ընթացքում ՌԴ արտգործնախարար Սերգեյ Լավրովը հայտարարել է. «Ներկայում Ղարաբաղյան հակամարտության կարգավորման շուրջ բանակցությունների սեղանին գտնվում է փաստաթուղթ, որն Անդրկովկասում ձգձգված հակամարտության փուլային կարգավորում է ենթադրում»:
Լարիսա Ալավերդյանը հիշեցնում է, որ դեռ երկու տարի առաջ է ինքը զգուշացրել, որ Արցախի շուրջ բուռն զարգացումներ են տեղի ունենում. «Հիշո՞ւմ եք՝ ինչ ազդակներ էր ուղարկում Ռուսաստանը տարբեր առիթներով: Այդ ազդակների տողակատերում կար լարվածություն ու կային սպասումներ Հայաստանից, որոնք չէին իրականացվում»:
Ըստ Լարիսա Ալավերդյանի՝ Հայաստանի իշխանություններն իրավունք չունեն ասելու, որ բանակցային սեղանին ոչինչ դրված չէ:
Հաղոդրման մյուս հյուրի՝ «Ազգային անվտանգություն» կուսակցության նախագահ Գառնիկ Իսագուլյանի խոսքով՝ գործող իշխանությունը շատ ազնիվ ու անկեղծ է. «Նիկոլը երբեք չի թաքցրել իր նկրտումները Արցախի տարածքների վերաբերյալ: Երկու օր առաջ իր լայվի ժամանակ էլ Նիկոլն ազնիվ էր, երբ ասում էր՝ ինձ հետ հեղափոխություն են արել մարդիկ, ովքեր պատրաստ էին «սամասուդ» անել»:
Գառնիկ Իսագուլյանը վստահ է, որ մեկ տարի է ՀՀ իշխանությունները խնդրում են Լավրովին ու համանախագահներին, որպեսզի մինչև Արցախում նախագահական ընտրությունների ավարտը չհայտարարեն փուլային բանակցությունների մասին:
Գառնիկ Իսագուլյանը ցածր է գնահատում ՀՀ ԱԳ նախարար Զոհրաբ Մնացականյանի պատասխանը. «Զոհրաբ Մնացականյանը թող ասի՝ ո՞վ է այդ փաստաթուղթը դրել սեղանին: Մերժել են նախկին փաստաթղթերն ու օրակարգ բերել այն փաստաթուղթը, որով ժամանակին ճանապարհ դրեցին առաջին նախագահ Լևոն Տեր-Պետրոսյանը»:
Խոսելով գազի գնի բարձրացման ու Սերգեյ Լավրովի պատասխանի մասին՝ Գառնիկ Իսագուլյանը նշել է. «Գազի գնի թանկացման հիմքում նաև ՀՀ երկրորդ նախագահ Ռոբերտ Քոչարյանի դատավարությունն է: Պուտինը մի քանի անգամ նշել է՝ դադարեցրեք այդ աբսուրդ դատավարությունը, բայց այս «հոգեկանները» շարունակում են այդ դատավարությունը»:
Հաղորդման վերջում խոսելով ՀՀ վարչապետ Նիկոլ Փաշինյանի վերջին ուղիղ եթերներին՝ Գառնիկ Իսագուլյանն ասել է. «Նիկոլ Փաշինյանն ուղիղ ասել է՝ ինձ իշխանության է բերել ոհմակը: Հասարակությունը թող որոշի՝ ովքեր են «սամասուդ» անողները: Առավել դաժան վենդետաները դեռ առջևում են»:
Հետևեք մեզ Facebook-ում