“Fly with me” երգը հատել է կես մլն դիտումների շեմը

«Եվրատեսիլ-2017» միջազգային մրցույթի “Fly with me” հայաստանյան երգը եվրատեսիլյան պաշտոնական յութուբյան ալիքում շուրջ 3 օրվա ընթացքում հատել է կես մլն դիտումների շեմը: Ոգեւորիչ է այն հանգամանքը, որ Արծվիկի թռիչքը հատել է ոչ միայն Հայաստանը, այլեւ ողջ Եվրոպան. երգը բուռն քննարկումների եւ վերլուծությունների առիթ է դարձել եւ հետաքրքրել ինչպես մեր հայրենակիցներին, այլեւ միջազգային հանրությանը:

Երգի մեղեդային գիծը հիմնված է աշխարհի տարբեր էթնիկ երաժշտությունների առանձնահատկությունների վրա եւ ոգեշնչված է մրցույթի այս տարվա «Տոնենք բազմազանությունը» կարգախոսից: Երաժշտության հեղինակները Լիլիթ եւ Լեւոն Նավասարդյաններն են, խոսքերի հեղինակներ՝ Ավետ Բարսեղյան եւ Դավիթ Ծերունյան:

Ի դեպ, Արծվիկը մեկնարկել է եվրատեսիլյան նոր challenge, որի շրջանակում հրավիրել է մրցույթի այս տարվա բոլոր մասնակիցներին տոնել բազմազանությունը՝ ցույց տալով, որ այն կարող է միավորել բոլորին: Արծվիկը կատարելի է գերմանական ժողովրդական երգ եւ առաջին մարտահրավերը նետել Գերմանիայի ներկայացուցիչ Լեվինային: Տեսանյութը կարող եք դիտել հետեւյալ հղումով՝ https://www.facebook.com/artsvikofficial/videos/1221203031312006/

Լեվինայի պատասխանը շատ չի ուշացել, մանրամասներին կարող եք ծանոթանալ հետեւյալ հղումով՝ https://www.facebook.com/levinamusic/videos/1554873907885925/

«Եվրատեսիլ-2017» երգի միջազգային մրցույթին Հայաստանը կներկայացնի Առաջին ալիքի «Դեպի եվրատեսիլ» մրցույթի հաղթող Արծվիկը: Մրցույթն այս տարի կանցկացվի մայիսի 9-ին, 11-ին եւ 13-ին Կիեւում: Արծվիկը ելույթ կունենա մայիսի 9-ին՝ 1-ին կիսաեզրափակչի ընթացքում: