Արդարադատության համար Ալեքսանդր Ազարյանի նվաճումները ոչնչացվում են հեղափոխականների կողմից, ես չեմ հասկանում, թե ինչի մեջ են մեղադրում նրան. Տիգրան Աթանեսյան. Տեսանյութ
Ես չգիտեմ, թե ինչի մեջ են մեղադրում Վերաքննիչ քրեական դատարանի դատավոր Ալեքսանդր Ազարյանին: Ես պաշտոնապես դիմել եմ Արդարադատության նախարարին՝ խնդրելով պարզաբանել իր որոշումը՝ կարգապահական վարույթի վերաբերյալ: Այս մասին այսօր Tert.am-ի հետ զրույցում ասաց Ալեքսանդր Ազարյանի փաստաբան Տիգրան Աթանեսյանը:
Հիշեցնենք, որ Ալեքսանդր Ազարյանի նկատմամբ կարգապահական վարույթ է հարուցվել, հաղորդումն արդարադատության նախարարություն է ներկայացրել Հատուկ քննչական ծառայության կոռուպցիոն, կազմակերպված և պաշտոնեական հանցագործությունների քննության վարչության պետի տեղակալ Հրաչյա Մուշեղյանը, որի վարույթում քննվել է «5-րդ Ալիքի» սեփականատեր Արմեն Թավադյանի վերաբերյալ քրեական գործը։
«Այդ հաղորդումն Արդարադատության նախարարը ստանալով՝ չորս էջով որոշում է կայացրել, որտեղ մեջբերումններ է կատարել հաղորդումից, այնուհետև, զետեղված են Դատական օրենսգրքից հոդվածներ, իսկ վերջում մի փոքր գրառում է, որ ուսումնասիրել են հաղորդումը և գտնում են՝ դատավորի մի քանի գործողություններում առկա են վարքագծի մի քանի խախտումներ»,-ներկայացրեց նա:
Դիտարկմանը, թե գուցե նախարարը բավարար է համարում այդ չափով մեկնաբանությունը, Աթանեսյանը պատասխանեց, որ անձնական վիրավորանք չի ուզում հասցնել, բայց ըստ նրա՝ այս իշխանությունները չեն սիրում իրավաբանությունն ու իրավաբաններին: «Նրանք օրենքն իրենց համար խոչընդոտ են համարում, այդպիսինն է նրանց վերաբերմունքն ու նման օրինակները բազմաթիվ են և նույնն այս մոտեցման մեջ է»:
Փաստաբանն ասաց, որ Ազարյանի նկատմամբ հարուցված վարույթն իրապես անհասկանալի է, և այս պարագայում դատական համակարգը գրագետ չի վարվում: Նրա խոսքով՝ եթե այսօր իրեն հարցնեն, թե ինչի մեջ են մեղադրում Ազարյանին, ապա ինքը չի կարող պատասխանել: «Ես այստեղ ոչ թե փաստաբան եմ լինելու, այլ էքստրասենս: Ես պետք է մտնեմ Ռուստամ Բադասյանի մտքերի մեջ, որպեսզի հասկանամ, թե ինչ խախտումներ է տեսել Ազարյանի գործելաոճում»:
Հարցին, թե արդյոք նիստի ժամանակ Ազարյանի կողմից ՀՔԾ քննիչի հասցեին արած հայտարարությունը, թե հույս ունի, որ նա չի իջնի իր պետի մակարդակին, վարույթ հարուցելու հիմք չէ, Աթանեսյանն ասաց, որ Ազարյանը նկատի չի ունեցել մարդու անձնական հատկանիշները:
Աթանեսյանը հիշեցրեց, որ 2018թ. օգոստոսից սկսած Հատուկ քննչական ծառայության պետն անընդհատ քննադատում է Ազարյանի որոշումները, ինչպես նաև Ռոբերտ Քոչարյանին ազատ արձակելու որոշումը Սասուն Խաչատրյանը ապօրինի էր համարել՝ առանց որոշմանը ծանոթանալու: Ըստ փաստաբանի՝ սակայն Ռոբերտ Քոչարյանին կալանքից անձեռնմխելիության հիմքով Ազարյանի որոշումը հեղափոխության առաջնային նվաճումներից մեկն էր:
«Ազարյանն իր մասնագիտության լավագույն կողմերը դրսևորեց: Այդ նվաճումները ոչնչացվում են հեղափոխականների կողմից: Այդ որոշումը ցույց տվեց, որ Հայաստանում կարող են ռեպրեսիվ համակարգեր չլինել, նրանք պետք է շնորհակալ լինեին Ազարյանից այդ որոշման համար, սակայն այն բեկանեցին: Օրինակ, ես երկու տարի Ազարյանից կողմից բավարարված վերաքննիչ բողոք չունեմ»,- շեշտեց փաստաբանը:
Անդրադառնալով վարչապետ Նիկոլ Փաշինյանի «վնգստացող դատավորներ» արտահայտությանը և Բարձրագույն դատական խորհուրդի լռությանը՝ Աթանեսյանը նշեց, Բարձրագույն դատական խորհուրդը վախենում է արձագանքել վարչապետին, քանի որ այս իշխանության օրոք է այդ կառույցը ստեղծվել:
Առավել մանրամասն՝ տեսանյութում: