Լևոն Տեր-Պետրոսյանը կոալիցիա կկազմի՞ Սերժ Սարգսյանի հետ
Երեկ Լևոն Տեր-Պետրոսյանը «Հ1»-ով խոսում էր Ղարաբաղը Ադրբեջանին հանձնելու մասին։ Իսկ ինչու՞ է Սերժ Սարգսյանը թույլ տվել, որ նրա «ոխերիմ թշնամին» ելույթ ունենա Հանրային Հեռուստատեսությամբ։ Գուցե, որ ցույց տա, թե մենք ինչպիսի ժողովրդավար պետությու՞ն ենք։ Այդ դեպքում, շատ ավելի լուրջ մարդկանց կարող էր թույլատրել ելույթ ունենալ Հանրայինով։ Համ էլ, ես ինչ-որ չտեսա, որ Լևոն Տեր-Պետրոսյանը քննադատի իշխանություններին։
Հակառակը՝ նա գովերգում էր ՀՀԿ-ին ու գրեթե բացահայտ կոչ անում՝ քվեարկել Սերժ Սարգսյանի կուսակցության օգտին։ Մի կողմից ասում է, որ առանց Ղարաբաղը հանձնելու Հայաստանը զարգանալ չի կարող և ոչ մի ոլորտում առաջընթաց գրանցել չի լինի։ Սա ներկայացնելով որպես աքսիոմ, պապին հայտարարում է, թե այսօր, ՈՒՇԱԴՐՈՒԹՅՈՒՆ, միայն ՀԱԿ-ն ու ՀՀԿ-ն են ներկայացնում Ղարաբաղյան հակամարտության կարգավորման իրատեսական տարբերակը, որը ենթադրում է տարածքների զիջում՝ անորոշ կարգավիճակի դիմաց։ Եվ նա դրանով չի սահմանափակվում և կոչ է անում չքվեարկել այն քաղաքական ուժերի օգտին, որոնք այլ տեսակետ են հայտնում։
Հիմա եթե մեր երկրի այս ծանր վիճակի միակ պատճառը Ղարաբաղն է, այս իշխանություններն էլ՝ իբր ցանկության դեպքում էլ որևէ լավ բան անել չէին կարող, իսկ հակամարտության լուծման մասին Լևոնի ու Սերժի պատկերացումները նույնն են, էլ ի՞նչ իմաստ կա մեկին մյուսով փոխելու կամ ընդհանրապես իշխանափոխություն իրականացնելու։
Մի խոսքով, այսօր Լևոն Տեր-Պետրոսյանն ավելի շատ դաշնակ է, քան լևոնական և ՀԱԿ-ն ու Դեմիրճյան Կրտսերի այն կուսակցությունը ամենահավակնոտ հայտն են ներկայացնում ՀՀԿ-ի հետ կոալիցիոն կառավարություն ձևավորելու համար։ Դա կլինի թերևս ամենաբնական և ամենաանկեղծ կոալիցիան՝ ընդդեմ Հայաստանի և Արցախի հանրապետությունների։
Սամվել Ստեփանյանի ֆեյսբուքյան էջից
Հետևեք մեզ Facebook-ում