Իշխանությունը փորձում է պոպուլիստական հարթակի վրա մնալ. ցուցադրականությունը պետք է վերացնել, ճգնաժամից հետո երկիրը ղեկավարելը շատ ավելի ծանր է լինելու. Հակոբ Ավետիքյան

Համավարակի հաղթահարումից հետո և՛ Հայաստանում, և՛ աշխարհում կլինեն սոցիալ-տնտեսական լուրջ վերափոխումներ՝ կապված սննդի, գյուղանտեսության, ջրի, էկոլոգիական ռեսուրսների հետ: «Արմնյուզ» ՀԸ «#ՕրաԽնդիր» հաղորդմանը նման կարծիք է հայտնել «Ազգ» շաբաթաթերթի գլխավոր խմբագիր Հակոբ Ավետիքյանը:

«Ինչպես բոլոր աղետներից հետո, կստեղծվեն նոր զենքեր, կառաջանան նորանոր երիտասարդական շարժումներ, ի հայտ կգան պետությունների կառավարման խնդիրներն ու բացերը, առավել ակնառու կդառնա միջազգային կազմակերպությունների, հատկապես Առողջապահության համաշխարհային կազմակերպության անգործությունը: ԱՄՆ-ն արդեն իսկ հրաժարվել է ԱՀԿ-ին անդամավճար տալուց»,- ասել է Ավետիքյանը:

Ըստ Ավետիքյանի՝ անգամ ԱՄՆ-ի պես կայացած երկիրը չի կարողանում դիմագրավել վարակի տարածմանը, և ակնհայտ է, որ կենսագործունեության երբեմնի չափանիշները չեն կարող գործի դրվել, պետք է գործել ոչ ստանդարտ կանոններով. «Հայաստանի առողջապահական համակարգն անզոր է: Դա այն դեպքում, երբ աշխարհի ոչ մի քաղաքում այսքան շատ դեղատներ ու մասնավոր, փոքր կլինիկաներ չկան: Այսօր կորոնավիրուսի դեմ պայքարողների մեծ մասը վարակաբաններ են և ոչ համաճարակաբաններ, մինչդեռ պետք է հակառակը լիներ»:

Խմբագրի կարծիքով՝ մեր կառավարությունը չի համարձակվի ասել, թե այս օրերին մարդիկ պետք է աշխատեն, քանի որ կդառնա մահերի պատասխանատուն, սահմանափակումներն աստիճանաբար վերացնելը նշանակում է, որ իշխանությունն ընդունում է՝ այս իրավիճակը ՀՀ-ում դեռևս երկար է շարունակվելու։ 

Մանրամասները՝ կից տեսանյութում։