«Մենք էն ա՞զգն ենք, որ անհայտ մարդու բերենք թաղենք». Սասուն Միքայելյանը՝ Թորոսյանին

ԱԺ «Իմ քայլը» խմբակցության պատգամավոր Սասուն Միքայելյանն այսօր նիստի ժամանակ հայտնեց, որ ահազանգեր է ստացել, որ քաղաքացիները որևէ հնարավորություն չեն ունենում տեսնել արտերկրից տեղափոխված իրենց հարազատ հանգուցյալի մարմինը.

«Մարդիկ ասում են՝ մենք չենք կարում իմանանք՝ արդյոք տեղափոխված անձը մեր հարազատն է, թե՝ ոչ»:

Ի պատասխան Առողջապահության նախարար Արսեն Թորոսյանն ասաց.

«Մենք պարետի ցուցումով մի կարգավորում ունենք, որ արտերկրից Հայաստան տեղափոխված բեռները չենք թույլատրում բացել, որպեսզի կարողանանք կանխարգելել հնարավորի վարակից վարակումը այդ միջոցառման մասնակիցների շրջանում: Ենթադրում եմ, որ այս ժամանակահատվածում այս կարգավորումը պետք է մնա, և մենք կարող ենք պարզապես մեր գործընկերների հետ այդ իդենտիֆիկացիոն գործընթացը կարագավորել՝ առանց այդ բեռը բացելու»:

Արձագանքելով նախարարին՝ Միքայելյանն ասաց.

«Մի քանի ամիս առաջ դեպք ա եղել, որ այլ ազգի ներկայացուցիչ են ուղարկել Հայաստան, ռուս ա եղել: 100 տոկոսով բան եմ ասում: Համարը խփում են, ուղարկում են, էլի, խառնում են իրար: Մի բան պիտի ձեռնարկվի: Մենք էն ա՞զգն ենք, որ անհայտ մարդու բերենք թաղենք: Մի ձև կարելի ա կարգավորել, որովհետև լուրջ բան ա սա»:

Նախարարն ի պատասխան նշեց, որ կփորձեն այլ տարբերակ մշակել՝ հարցին լուծում տալու համար:

Zham.am