Աշխարհը կոլապսի մեջ է, և Նիկոլ Փաշինյանի՝ տնտեսական լավատեսությունը հիմնավոր չէ․ Վարդան Բոստանջյան

Ամբողջ աշխարհը կոլապսի մեջ է գտնվում։ Պարզ է, որ Նիկոլ Փաշինյանի՝ տնտեսական առումով լավատեսությունը հիմնավոր չէ։ Այս մասին Tert.am-ի հետ զրույցում ասաց տնտեսագետ, ԱԺ նախկին պատգամավոր Վարդան Բոստանջյանը՝ անդրադառնալով վարչապետ Նիկոլ Փաշինյանի՝ ճգնաժամի ընթացքում միջազգային կառույցների կանխատեսումների վերաբերյալ գրառմանը։

«Ամբողջ աշխարհը կոլապսի մեջ է գտնվում։ Տնտեսական շրջանառությունը, ընդհանրապես մարդկային սպառումը, բոլոր տիպի հարաբերությունները նահանջել են։ Այս անորոշության, համավարակի պարագայում մարդիկ այնքան շփոթված են, ոչ մեկ գոնե մոտավորապես չի կարողանում կողմնորոշվել, թե ինչ պետք է անի։ Այս իրավիճակում ինչ-որ դրական զարգացումներից խոսել, այն էլ տնտեսության բնագավառում, դրանից անհարմար բան գոյություն չունի»,- նշեց նա։

Հիշեցնենք, որ Արժույթի միջազգային հիմնադրամի կանխատեսումների համաձայն` կորոնավիրուսի համաճարակը հանգեցնում է խոշորագույն համաշխարհային տնտեսական ճգնաժամի, որն աննախադեպ կլինի 1929-1933թթ. Մեծ ճգնաժամից ի վեր: ԱՄՀ ղեկավար Կրիստալինա Գեորգիևայի խոսքով` նույնիսկ լավագույն սցենարի դեպքում հնարավոր կլինի տնտեսության որոշակի վերականգնում ակնկալել 2021թ: «Սակայն ամեն ինչ կարող է շատ ավելի վատ լինել»,- ասել է Կրիստալինա Գեորգիևան:

|Վարչապետ Նիկոլ Փաշինյանը, սակայն, այսօր ֆեյսբուքյան իր էջում տնտեսական առումով բավականին լավատեսական գրառմամբ էր հանդես եկել․ «Ֆինանսական շուկայի արագ արձագանքը կառավարության հակաճգնաժամային միջոցառումների արդյունավետության ուղղակի ապացույցն է։ Դրամն ամրապնդում է կայունությունը, ավանդներն ու վարկերն աճում են, աճում է նաև բանկերի լիկվիդայինությունը։ Դուխով»,- գրել էր նա։

Վարդան Բոստանջյանի խոսքով՝ պետք չէ զարմանալ ՀՀ վարչապետի հռետորաբանության վրա։ Նախկին պատգամավորը նկատում է, որ 2018թ. մայիսից՝ իշխանության գալուց ի վեր, Նիկոլ Փաշինյանը խոսում է բացարձակապես դրական երևույթների մասին։
«Այսինքն, այդ նկարագրությամբ Հայաստանում հիասքանչ է: Մարկանց զանգված կա, որոնք ուզում էին դիմացինից լսել այն, ինչը հիմա արվում է։ Երևի նրանց թիվը մեծ է և այս պահի դրությամբ նրանց սին, փուչ խոսքերով կերակրելու համար կարելի է ասել՝ ամեն ինչ լավ է, հոյակապ է»,- նշեց Վարդան Բոստանջյանը։

Մանրամասները՝ Tert.am-ում: