Թիրախային խմբում գտնվող կալանավորներին ազատ չեն արձակում, որպեսզի Ռ․ Քոչարյանի պաշտպանները դատարանում այդ որոշումները չօգտագործեն՝ ցույց տալով կոնկրետ այս գործով խտրական վերաբերմունք․ Մ․ Պողոսյան. Տեսանյութ

Որպես քաղաքացի՝ ցավով եմ արձանագրում, որ այժմյան պայմաններում նույնիսկ մարզպետերն են որոշակի տեղեկատվություն տալիս իրենց մարզերում տիրող իրավիճակից, իսկ Երևանում քաղաքապետի կողմից չենք տեսնում նույնչափ սրտացավություն․ սա ցավալի է։ Այս մասին Անժելա Թովմասյանի՝ Արմնյուզ ՀԸ  «Հայելու առաջ» հեղինակային հաղորդման ժամանակ ասել է փաստաբան Միհրան Պողոսյանը։

Հաղորդման մյուս հյուրի՝ «Քաղաքացիական գիտակցություն» ՀԿ նախագահ Նարեկ Սամսոնյանի խոսքով՝ աշխարհում յուրաքանչյուր մեծ քաղաքի քաղաքապետ շփվում է իր քաղաքացիների հետ․ «Հայկ Մարությանը չի զգում քաղաքապետի պատասխանատվություն։ Ուղիղ եթերում ես նրան միայն տեսել եմ աղբի մեքենաների հետ։ Եթե գնահատենք Հայկ Մարությանի աշխատանքը, ապա երկու բալով կգնահատենք»։

Ըստ Նարեկ Սամսոնյանի՝ Հայկ Մարությանը Երևանի պատմության մեջ մնալու է ամենավատ ու ամենավախկոտ գործիչը։

Խոսելով Քաղավիացիայի շուրջ տեղի ունեցած վերջին զարգացումներից ու ՀՀ վարչապետի խորհրդական Հակոբ Ճաղարյանի հրաժարականից՝ Նարեկ Սամսոնյանն ասել է․ «Վատ կառավարումը քաղավիացիայիում հանգեցրել է լուրջ խնդիրների։ Իշխանությունը ոչ թե փորձում է լուրջ խնդիրները լուծել, այլ՝ արդարանալ։ Քանի դեռ իշխանությունների վերաբերմունքն այսպիսին է, մենք անընդհատ ունենալու ենք տույժեր միջազգային մակարդակով»։

Միհրան Պողոսյանի դիտարկմամբ էլ՝ իշխանությունը մամուլում տեղ գտած յուրաքանչյուր տեղեկատվություն առաջին հերթին հերքում է․ «Հերքում պահանջելուց հետո իշխանությունն անցնում է մանիպուլատիվ քայլերի՝ թույլ չտալով, որպեսզի իրական խնդիրը չլուծվի, ծածկադմփոց են անում»։

Հարցին՝ գիտե՞ք, որ Հակոբ Ճաղարյանին հրավիրել են ԱԱԾ, Միհրան Պողոսյանը պատասխանել է․ «Հայաստանում վերջին երկու տարում ԱԱԾ-ից մարդիկ չեն վախենում։ Իշխանության պատճառով՝ ԱԱԾ-ի նման լրջագույն կառույցը վերածվել է մարդկանց լռեցնելու, քաղաքական հաշվեհարդար տեսնելու կառույցի»։

Անդրադառնալով կորոնավիրուսով պայմանավորված կալանավայրերը «բեռնաթափելու» անհրաժեշտությանը՝ Միհրան Պողոսյանը նշել է․ «Միջազգային կառույցների կոչերը բոլորիս են հայտնի։ Բազմաթիվ են մեղադրյալները, ովքեր գտնվում են խոցելի խմբում, բայց նրանց նկատմամբ որևէ բարեհաճ վերաբերմունք չի դրսևորվում։ Ակնհայտ է եզրահանգումս՝ չեն ցանկանում նմանատիպ թիրախային խմբում մարդկանց ազատ արձակել, որպեսզի Ռոբերտ Քոչարյանի պաշտպանները այդ որոշումները դատարանում չօգտագործեն՝ ցույց տալով կոնկրետ այս գործով խտրական վերաբերմունք»։

Նարեկ Սամսոնյանն էլ խորին համոզմունք ունի, որ բացառապես քաղաքական դատավարություններով է պայմանավորված կալանավայրերը «բեռնաթափելու» քայլին չգնալը․ «Նորմալ իշխանությունը հրապարակայնորեն կդիմեր դատախազությանն ու կխնդրեր, որ հենց Ռոբերտ Քոչարյանի գործով վերանայեին նախնական կալանքի որոշումը»։ Ըստ նրա՝ այս պարագայում առաջին հերթին բարոյականության խնդիր կա։