«Օհանյան-Րաֆֆի-Օսկանյան» դաշինքը Գյումրիում է (Տեսանյութ)

Դաշինքի անդամները Գյումրի քաղաքում են։ Այստեղ իր կուսակիցներին է միացել Րաֆֆի Հովհաննիսյանը։ Սեյրան Օհանյանն ու Արմեն Մարտիրոսյանը մեկնել են Երևան՝ մասնակցելու Արթուր Սարգսյանի հոգեհանգստին։ Հավաքվածները 1 րոպե լռությամբ հարգել են Հաց բերողի հիշատակը։

Ռեժիսոր Սարգիս Միքայելյանը նշել է՝ երկրում այսօր համբերության բաժակը լցվել է, դանակը հասել է ոսկորին, Երևանից արվեստագետների մի ստվար խումբ միացել է «Օհանյան–Րաֆֆի–Օսկանյան» դաշինքին, որից էլ սպասում են հայրենիքի ճակատագրի կարգավորում։ Միքայելյանը կոչ է արել գյումրեցիներին իրենց ձայնը տալ հենց այդ դաշինքին։

–Ես Հայաստան վերադարձա Արցախյան շարժման ազատամարտին զուգահեռ մեծ աղետի՝ երկրաշարժի օրերին։ Փաստորեն, դուք հրավիրեցիք իմ վերադարձը հայրենի երկիր և երկրաշարժից մի քանի օր անց մորս՝ Վարդիթերի հետ, Գյումրիում էի, փլատակների մոտ՝ խարույկների գիշերային սգով կիսելով ձեր ցավը, որ դուք տարաք և տանում եք թասիբով,– գյումրեցիների հետ հանդիպմանն ասել է «Օհանյան–Րաֆֆի–Օսկանյան» դաշինքի անդամ Րաֆֆի Հովհաննիսյանը։

–Գյումրին, Շիրակը, ողջ Հայաստանն իր ցավը, իր պայքարը, իր վերքը և իր սխրանքը տանում է թասիբով։ Այս տարիների ընթացքում մենք դարձել ենք ընտանիքի անդամ, իրար հարազատ, կիսել ենք հաց և հույս, ուրախություն, հուսախաբություն և նորից պայքարի ոգի։ Գյումրին՝ որպես հայրաքաղաք, թասիբի քաղաք, թույլ չի տվել և թույլ չի տալու, որ որևէ մեկը, կեղծարար մեքենայի շեֆ՝ կուսակցապետից սկսած՝ մինչև ամենավերջին չինովնիկը, իր փոխարեն ինչ–որ համար խփի։ Դուք որոշեցիք խփել ձեր խղճի համարը մի քանի տարի առաջ և այս տարի ձեր խղճի, մեր պայքարի, մեր հաղթանակի համարը ութն է՝ հավերժության ութը, ժառանգության ութը, համախմբման ութը, մեր երկրի միասնության ութը։

Հենց Գյումրու օրինակով մենք պետք է դուրս գանք մեր սեփական վախից, ստրկամտությունից և խփել այն հավերժության, խղճի համարը, որը բերելու է իրական փոփոխության՝ աշխատատեղեր, արժանապատվություն, աշխատավարձեր, և այլևս ոչ մի հայ ընտանիք դոմիկի տանիքի տակ, հայրենիքը դարձնել վերադարձի, ներգաղթի երկիր, այլ ոչ թե փախուստի։ Սա՛ է մեր հավատո հանգանակը, և դրա համար մենք պատրաստ ենք համագործակցել քաղաքական բոլոր ուժերի, քաղաքացիական հասարակության, շարքային քաղաքացիների հետ՝ բերելու համար այդ նոր Հայաստանը,–հավելել է Ր. Հովհաննիսյանը։
7

Դաշինքից պատգամավորության ռեյտինգային թեկնածու Հովհաննես Ասոյանը, դիմելով գյումրեցիներին, ասել է.

–Բոլորս գիտենք, որ այսօր մեր երկիրը կանգնած է մի միջոցառման առջև, որը հետագայում որոշելու է մեր կյանքի որակը առաջիկա մի քանի տասնամյակների համար։ Դրա համար մեր դաշինքը կոչ է անում մասնակցել այս ընտրություններին և մասնակցել գիտակցաբար։ Չկա Հայաստանում մի ընտանիք, մի մարդ, բացի մի 3–4 տոկոսից, ում այսօր ձեռնտու է այս իրավիճակը, չկա մի մարդ, ով չի հասկանում, որ փոփոխությունն անհրաժեշտ է։ Մեր դաշինքը եկել է ներկայանալու ձեզ իր ծրագրային դրույթներով, իր մտահոգություններով կիսվելու ձեզ հետ և ներկայացնելու, թե ինչ ենք անելու մենք իշխանության գալուց և ինչ քայլերով ենք գնալու առաջ։ Ես կոչ եմ անում բոլորին ձայնը տալ մեր դաշինքին։ Ինչի՞ համար մեր դաշինքին։ Մեր դաշինքը գլխավորում են 3 փորձառու մարդիկ, ովքեր իրենց ապրած կյանքով, իրենց աշխատանքով ապացուցել են, որ կարող են, ունակ են և ազնիվ են ժողովրդի առաջ։