Հիմա էլ «պատերազմականի» պատրվակո՞վ են ցանկանում փակել լրատվամիջոցների բերանը
«Հուսալ, որ Հայաստանի երկրորդ եւ երրորդ նախագահներն իրենց վերահսկողության տակ գտնվող լրատվամիջոցներին կկարգադրեն անմիջապես դադարեցնել իշխանությունների դեմ վերջիններիս ծավալած կատաղի պայքարը եւ այդու չեն կորցնի պետական այրին վայել վարք դրսեւորելու այս պատեհությունը»:
Սա գրել է մի մարդ, ով 1995 թվականին փակեց Դաշնակցությունը և բազմաթիվ լրատվամիջոցներ: Մի մարդ, ով երկրում մնացած խորհրդային տնտեսական և արտադրական ժառանգությունը փոշիացրեց և մետաղի ջարդոնի վերածեց: Մի մարդ, ով դրա համար դեռևս պատասխանատվության չի կանչվել, բայց քրեական մեղադրանքներով հետապնդվող իր հաջորդներին կոչ է անում պետական այրին վայել վարք դրսևորել:
Հարց, իսկ երկրորդ ու երրորդ նախագահների հսկողության տակ չգտնվող լրատվամիջոցները կարո՞ղ են շարունակել քննադատել ներկայիս իշխանությունների վարած քաղաքականությունը:
Թող պարոն Տեր-Պետրոսյանն իմացած լինի, որ հատուկ համաճարակի դեմ արդյունավետ պայքարի նպատակով վարչապետը ստեղծել է պարետատուն, որ բուն կառավարությունը զբաղվի տնտեսական ու մյուս հարցերով: Լրատվամիջոցներն այս օրերին բարձրացնում են այնպիսի հարցեր, որ կառավարության անդամները նույնիսկ վախենում են զեկուցել ի պաշտոնե. քաղավիացիան, բանկերի կողմից վարկեր չտրամադրելը, առաջին անհրաժեշտության ապրանքների գների բարձրացումները և այլն, կամ «բռնացնում են» վարչապետի թվաբանական մանիպուլյացիաները և լեզվի «սայթաքումները»:
Տեր-Պետրոսյանը, չգիտես ինչու, հանկարծ «խիստ» կարևորել է Ապրիլյան պատերազմի հանգամանքների հետաքննության խորհրդարանական հանձնաժողովի աշխատանքը, և առաջարկում է սառեցնել այն, որպեսզի ավելորդ գրգռություն չառաջացնի երկրի առանց այդ էլ գերլարված մթնոլորտում։ Գուցե նա հասկացել է, որ երրորդ նախագահի սպասվելիք պատասխաններից կամ հանձնաժողովին ընդհանրապես չներկայանալուց հետո այդ հանձնաժողովն ու նրա հեղինակները կարող են վերջնականապես հեղինակազրկվել, չի բացառվում:
Իսկ գուցե ոչինչ էլ չի ցանկանում ասել, այլ իշխանությունների համար միայն տեղեկատվական առիթ է ապահովում, որպեսզի առավել խստացվեն մարդկանց հիմնարար ազատությունների և իրավունքների սահմանափակումները:
Էդուարդ Սարիբեկյանի ֆեյսբուքյան էջից
Հետևեք մեզ Facebook-ում