Եթե չեք կարողանում ճյուղավորումների ընտրանքը ստուգել, գոնե դեղատների, խանութների և բանկերի աշխատողներին տեստավորեք

Այն, որ այս իշխանությունը ցույց տվեց իր ոչ էֆեկտիվ աշխատանքը վիրուսի դեմ պայքարում, ակներև  է: Այս պայմաններում իշխանությունները  պարտավոր են գոնե պրոֆիլակտիկ քայլերի դիմել:

Այսօր աշխատող բոլոր դեղատների, խանութների և բանկային բաժանմունքների աշխատողները պարտադիր պետք է տեստավորվեն:

Ինչո՞ւ հենց այդ օբյեկտների աշխատողներին պետք է ստուգել:

Բանն այն, որ այս վիրուսով կարող են վարակվել մարդիկ`  չունենալով ոչ մի հիվանդության սիմպտոմ: Բայց այդ վարակակիրները կարող են վարակել հետագայում առողջ մարդկանց, որոնք կարող են հայտնվել ծանր վիճակում: Տեսականորեն, եթե այդպիսի վարակակիրը տանն է նստած, ապա նրանից վարակվողների շրջանակը սահմանափակ կարող է լինել: Մինչդեռ, եթե վարակակիրը, օրինակ, խանութի աշխատող է, ապա նա շփվում է օրեկան տասնյակ և հարյուրավոր մարդկանց հետ և մեծ է հավանականությունը, որ նա կարող է վարակել շատերին:

Այդ իսկ պատճառով կառավարությունը պետք է անհապաղ հետևյալ որոշումները կայացնի:

Առաջին

Խանութների, դեղատների, բանկերի սպասարկման բոլոր աշխատակիցները պարտադիր պետք է լինեն բժշկական ձեռնոցներով և դիմակներով:

Երկրորդ

Եթե իշխանությունները կորցրել են վիրուսակիրների ճյուղավորումների բոլոր թելերը, ապա նրանք պարտավոր են բնակչության հետ ակտիվ շփման մեջ գտնվող բանկերի, խանութների և դեղատների սպասարկման կազմին պարտադիր տեստավորել:

Եթե այս քայլերը չարվեն, իսկ  ճյուղավորման ընտրանքն էլ արդեն կորսված է, ապա հարց է առաջանում՝ իշխանությունը ողջ բնակչությանը կարանտինի տակ է պահում, որ ի՞նչ անի:

Այդ կարանտինով էական արդյունքի հնարավոր չէ հասնել: Այս քայլով կարելի կլինի փոքր-  ինչ դանդաղեցնել աճի տեմպը և ոչ ավելին:

Հասմիկ Գրիգորյան