Այն, որ մեզ մոտ Վրաստանից հինգ անգամ ավելի վատ վիճակ է մեղավոր են Փաշինյանն ու Թորոսյանը

Այսօր հայտնի դարձավ, որ մեկ օրվա ընթացքում մեզ մոտ վարակակիրների քանակն ավելացել է 92-ով, և ընդանուր վարակվածների թիվը կազմել է 663-ը: Եվ դա այն դեպքում, երբ հարևան Վրաստանում որտեղ ապրում է 25 տոկոսով ավելի շատ մարդ, քան մեզ մոտ, վարակակիրների քանակը 115-է:

Ինչու այդպես ստացվեց, արդեն պարզ է նույնիսկ «պողոսների» համար: Այն ժամանակ, երբ ողջ աշխարհը պայքարում էր այս վիրուսի դեմ, Նիկոլ Փաշինյանը իր անձնական շահի համար հանրաքվեի էր պատրաստվում, հանրահավաքներ կազմակերպում: Այսինքն, ինքը՝ Փաշինյանը իր անձնական շահը վեր դասեց հանրային շահից: Բայց այս ամենի մեջ մեղավոր է ոչ միայն Փաշինյանը, այլև նրա թիմակիցները և  հանրության «պողոսական» հատվածը: Հենց  նրանց պատճառով է, որ այսօր մեզ մոտ վարակվածների թիվը հինգ անգամ ավելին  է, քան Վրաստանում: Ավելին` հարևան Ադրբեջանում  որտեղ ապրում է մոտ 10 մլն մարդ վարակվածների թիվը ավելի քիչ է,  քան մեզ մոտ:

Սա իսկական հանցագործություն էր այս մարդկանց կողմից: Թվում էր, թե ժամանակին Փաշինյանին պետք է սանձեր ՀՀ առողջապահության նախարարը, ով փետրվարի վերջին նոր էր եկել Հարավային Կորեայից և ճգրիտ տիրապետում էր այնտեղի իրավիճակին:

Սակայն նա էլ, օբյեկտիվ իրավիճակն ու անհրաժեշտ քայլերի իրագործումը  ստորադասեց ընդհանուր թիմում հաստատված մթնոլորտին և հայտարարեց, որ «այս վարակը լուրջ վտանգ չի ներկայացնում և նույնիսկ դպրոցների աշխատանքը անհրաժեշտ չի դադարեցնել»: Ավելին` հանուն դրա նա պատրաստ էր իր երեխաներին ուղարկել դպրոց, որպեսզի հանգստացնի հանրային տագնապը և դրանով իսկ դուր գա իր շեֆին:

Այստեղ է, որ հարց է առաջանում: Կարելի՞ է արդյոք վստահել այսպիսի նախարարին, ով նույնիսկ իր երեխաներին է պատրաստ զոհաբերել` իր շեֆին դուր գալու համար: Եթե մարդն իր երեխայի շահը ստորադասում է իր շեֆի շահից, կարո՞ղ է արդյոք վեր դասել հանրության շահը Փաշինյանի շահից:

Կարո՞ղ է արդյոք այսպիսի մարդը վստահություն առաջացնել հանրության մոտ: Կարծում ենք, որ հարցի պատասխանը պարզ է բոլորի համար:

Պարզվեց, որ Փաշինյանի «կորոնավիրուսը ում շունն է» կարգախոսը այսօր արդեն ակտուալ չէ: Պարզվեց, որ «այդ շունը» լավ էլ «կծան է»: Ավելին` այդ «շան» պատճառով այսօր երկրում հաստատվել է հատուկ դրություն, մարդիկ մահանում և անհայտ է, թե ինչ է սպասվելու մեզ մոտակա մեկ-երկու ամիսների ընթացքում:

Այս ամենը նշանակում է, որ այսօրվա Հայաստանի խնդիրների բարդացման գլխավոր պատասխանատուները անձամբ Նիկոլ Փաշինյանն ու Արսեն Թորոսյանն են: Նրանց հավատացող այն ցածրորակ զանգվածը, որին համեստորեն անվանում են «պողոսներ»:

Այն, որ սրանք արդեն դարձել են քաղաքականապես «ժամկետանց ապրանքներ»տեսանելի է արդեն հանրության մեծ մասի համար:

Սակայն այսօր հանրության գլխավոր խնդիրը պետք է լինի ստիպել պարետատանը կատարել այն անհրաժեշտ քայլերը, որպեսզի Հայաստանը վերջնականապես չդառնա «տարածաշրջանային Իտալիա»: Քանզի մեզ համար, ի տարբերություն Իտալիայի, դա ոչ միայն առողջապահական, այլև սուր անվտանգության սպառնալիք կարող է դառնալ, դրանից բխող լրջագույն հետևանքներով:

Մենք մի անգամ 1915-ին, երբ ողջ աշխարհը խառնված էր, տեսել ենք դրա հետևանքները: Երկրորդ անգամ այդպիսի «շռայլություն» իրավունք չունենք դրսևորել, եթե չենք ուզում վերջնականապես վերանանք այս երկրագնդից, որպես Homo sapiens տեսակ:

Սա է իրականությունը:

Արտակ Հակոբյան