Ռուսաստանում ևս անձանց տեղաշարժը վերահսկվում է սմարթֆոններով

Մարտի 27-ից Ռուսաստանում գործարկվում է համակարգ, որը նախատեսված է սմարթֆոնների միջոցով այն անձանց տեղաշարժը վերահսկելու համար, ովքեր կարող են կապ ունենալ COVID-19 կորոնավիրուսով վարակված անձանց հետ, գրում է Настоящее Время-ն։ Հատուկ ծառայությունը հնարավորություն կունենա գեոլոկացիայի վերաբերյալ տվյալներ ստանալ կորոնավիրուսով հիվանդ մարդկանց մասին, այնուհետև այն կուղարկի շտաբ՝ համապատասխան մարզերում կորոնավիրուսային համաճարակի դեմ պայքարի համար:

Իրավապաշտպանները պնդում են, որ այս գործողություններն անօրինական են, թեպետ նման միջոցառումներ կորոնավիրուսի համավարակի բռնկումից ի վեր օգտագործվում են շատ երկրներում, այդ թվում Չինաստանում, Արևմտյան Եվրոպայի երկրներում և ԱՄՆ-ում:

Մարտի 23-ին մարդկանց տեղաշարժը սմարթֆոնների միջոցով վերահսկելու մասին հայտարարեցին նաև ՌԴ իշխանությունները: Այդ մասին որոշումը ստորագրեց վարչապետ Միխայիլ Միշուստինը: Կրեմլն իր հերթին շտապեց հայտարարել, որ նման միջամտությունը չի համարում օրենքի խախտում:

Սա ռուս պաշտոնյաների առաջին փորձը չէ, երբ նրանք դիմում են անձնական տվյալների հավաքագրման նորարարական մեթոդներին: Մարտի կեսերին «Ռոսպոտրեբնադզորը» հաղորդել էր, որ դեմքի ճանաչման տեսախցիկների շնորհիվ հայտնաբերվել է կարանտին խախտող մոտ 200 անձ: Եվ սա միայն Մոսկվայում: Այսպիսով, գերատեսչությունը եկավ այն եզրահանգման, որ դեմքի ճանաչման համակարգն ապացուցում է իր արդյունավետությունը:

Համաձայն այս օրենքի՝ նման տեղեկատվության հավաքագրումը պահանջում է քաղաքացու համաձայնությունը, իսկ ներկա պայմաններում` դեմքի ճանաչման համակարգով կամ սմարթֆոնի միջոցով գեոլոկացիայի տվյալների վերաբերյալ որևէ մեկը նման համաձայնություն չի տվել:

«Մի խոսքով, սա ուղղակի ապօրինի է»,- նշում է «Ագորա» միջազգային իրավապաշտպան խմբի փաստաբան Դամիր Գայնութդինովը:

Zham.am