Ինչո՞ւ չեք վերահսկում խանութների, դեղատների և բանկերի հակավիրուսային գործողությունների որակը

Ինչպես հայտնի է երեկ կառավարությանը հաջողվեց ԱԺ-ով անցկացնել մարդկանց տեղորոշելու օրենքի նախագիծը, որի համաձայն արտակարգ դրության դեպքում բջջային ցանցի օպերատորները պարտավոր են պետական մարմիններին տրամադրել հաճախորդների կողմից օգտագործվող ծառայության վայրը պարզելու համար անհրաժեշտ տվյալներ և հաճախորդի հեռախոսահամարի հետ ուղիղ կամ անուղղակի կապ ունեցած հեռախոսահամարները, հեռախոսային խոսակցությունն սկսելու ամսաթիվը, սկիզբը և ավարտը պարզելու համար անհրաժեշտ տվյալներ, իսկ հեռախոսային զանգի վերահասցեագրման կամ փոխանցման դեպքում. այն հեռախոսահամարի վերաբերյալ տվյալներ, որին փոխանցվել է զանգը: Հասկանալի է, որ նորմալ պայմաններում այս քայլը աննախադեպ կլիներ և ցանկացած պարագայում մերժելի կլիներ:

Այս պայմաններում իշխանությունն այս օրենքի ընդունումն հիմնավորում է արտակարգ պայմաններով: Բա՞ մարդկանց կյանքն  ավելի կարևոր չէ՞ քան ազատությունը,- նշում են նրանք:

Առաջին հայացքից իշխանությունների հիմնավորումները հասկանալի են: Մի կողմ թողնենք, որ այս քայլով նրանք հնարավորություն կստանան իրենց ընդդիմախոսների շարժը լիովին վերահսկել:

Սակայն իշխանության անկեղծությունը գնահատելու համար արժե տեսնել, թե ինչ է կատարվում այս օրերին դեղատներում, մթերային խանութներում և բանկերում:

Այդ օբյեկտներից շատերում սպասարկման աշխատակազմի մի մասը առևտուր է անում առանց  բժշկական ձեռնոցների ու դիմակների: Փակ տարածքում երբեմն հայտնվում են չափից շատ մարդիկ, որոնց քանակը ոչ ոք չի վերահսկում:

Սա իսկական խայտառակություն է, իսկ բնակչության համար աղետ, քանզի այս գործոնը նպաստում է վիրուսի տարածմանը:

Իսկ հիմա պարզ հարցադրում: Եթե իշխանությունները չեն կարողանում լուծել այս տարրական խնդիրը, ապա ինչպե՞ս են նրանք կարողանալու ավելի լուրջ քայլերի դիմել:

Մի՞թե պարզ չէ, որ եթե պետությունը չի կարողանում վերը նշված կետերում ապահովել տարրական հիգիենայի կանոնները, ապա ինչպե՞ս են նրանք կարողանալու էլեկտրոնային միջոցներներով կանխել վիրուսի տարածումը:

Սա  ցույց է տալիս ,որ  պետությունն  այսօր անզոր է դարձել լուծելու համար այն  խնդիրները, որոնք վաղուց պիտի լուծված համարվեին, որից հետո միայն կարելի էր անդրադառնալ ավելի լուրջ քայլերին:

Դրա համար էլ այսօրվա իշխանության ցանկացած քայլը վստահություն չի ներշնչում: Մարդիկ բաց աչքերով տեսնում են բարդակի այս աստիճանը և հասկանում, որ մնացած քայլերն էլ լուրջ օգուտ կարող են  չտան:

Հասմիկ Գրիգորյան