ԱԺ-ում երկրորդ ընթերցմամբ չընդունվեց վիճահարույց նախագիծը

Խորհրդարանը երկրորդ ընթերցմամբ և ամբողջությամբ քվեարկության ներկայացրեց «Արտակարգ դրության իրավական ռեժիմի մասին» և «Էլեկտրոնային հաղորդակցության մասին» օրենքների փաթեթում փոփոխություն կատարելու Կառավարության առաջարկը, որով պետք է վերահսկողություն սահմանվեր հեռախոսային խոսակցությունների նկատմամբ:

Մինչ քվեարկությունը վարման կարգով խոսեց «Լուսավոր Հայաստան» խմբակցության ղեկավար Էդմոն Մարուքյանը` կոչ անելով ԲՀԿ-ին չմասնակցել քվեարկությանը, որպեսզի քվեարկությունը տապալվի: Մարուքյանի խոսքով` քաղաքական մեծամասնությունը անհրաժեշտ թվով քվեներ չունի:

«Իմ քայլը» խմբակցության ղեկավար Լիլիթ Մակունցը կոչ արեց ընդդիմությանը կողմ քվեարկել` ցուցաբերելով միասնականություն:

Փաթեթը մերժվեց 65 ձայներով:

Մակունցը քվեարկությունից հետո հայտարարեց, որ ընդդիմությունն իր կրավորական կեցվածքով արեց ամեն ինչ, որպեսզի բուժհամակարգի գործունեությունը պարալիզացվի:

Այս փոփոխություններով առաջարկվում էր կապի օպերատորների հաճախորդների կողմից օգտագործվող ծառայության վայրը պարզելու համար անհրաժեշտ տվյալները` հաճախորդի տեղորոշումը պարզելը, հաճախորդի հեռախոսահամարի հետ ուղիղ կամ անուղղակի (միջնորդավորված) կապ ունեցած հեռախոսահամարները փոխանցել Կառավարության լիազոր մարմնին: Սահմանափակումները գործելու են միայն համաճարակի հետևանքով արտակարգ դրության ժամանակ: Արտակարգ դրության ավարտից ոչ ուշ, քան մեկ ամսվա ընթացքում հավաքագրված տվյալները ոչնչացվելու են:

Zham.am