Անհնար է հսկել 500 հիվանդի շարժը. սմարթֆոններով մարդկանց հետևելը՝ հիմարություն

Քաղաքագետ, «Մեդիա Պաշտպան» նախաձեռնության ղեկավար Աղասի Ենոքյանը «Ֆեյսբուքում» գրառում է կատարել և անդրադարձել է «Արտակարգ դրության իրավական ռեժիմի մասին» և «Էլեկտրոնային հաղորդակցության մասին» օրենքներում լրացումներ կատարելու նախագծերին, որոնք ըստ քաղաքագետի՝ որևէ կերպ չեն կարող կանխել կորոնավիրուսի տարածումը: Աղասի Ենոքյանի գրառումն ամբողջությամբ՝ ստորև.

«-Ընդհանրապես, վարակի տարածման այս փուլում ամեն վարակվածի կոնտակտներին հետևելն այլևս էֆեկտիվ չէ։ Ունենք շուրջ 500 թեստավորված վարակակիր։ Ըստ համաճարակաբանության կանոնների, դա նշանակում է, որ ունենք առնվազն 5000-7000 վարակակիր, որոնց մեծ մասը թեսթավորված չէ։ Սա նշանակում է, որ պետք է քննարկվի առնվազն 50 000-100 000 կոնտակտ, ինչը անհնար է՝ չկան ոչ մարդկային, ոչ էլ այդքան տեխնիկական ռեսուրսներ։ Հարավային Կորեայի դեպքում կոնտակտներին հետևելը լավ աշխատեց 30 հիվանդի դեպքում, 31-ից հետո տարածումը դարձավ անվերահսկելի։ Վրաստանում դեռևս 90 հիվանդի դեպքում այն լավ է աշխատում, քանի որ սկսել են հենց առաջին վարակակրի դեպքից հետո։ 500 հիվանդի դեպքում անհնար է նման աշխատանքը։

- Մեծ քանակով հիվանդների դեպքում անհրաժեշտ է լրիվ այլ ռազմավարություն ընտրել՝ վարակի մեծ օջախները մեկուսացնել, առավել խոցելի խմբերին առնել հատուկ ուշադրության և հոգատարության տակ, բուժանձնակազմի աշխատանքներին մեծ օժանդակություն տալ, ձեռք բերել թեսթավորման և բուժման միջոցներ։

- Հեռախոսային խոսակցությունները գաղտնալսելով համաճարակը կանխելը պարզապես հիմարություն է, «ՔՊ»-ական «աննախադեպ» առաջարկ, առաջինը աշխարհում։ Անգամ Սուրբ Գեղարդով հայ ազգի իմունիտետը բարձրացնելու հովիկաղազրյանական առաջարկը սրա կողքին խելամտության նմուշ է։

- Սմարթֆոններով մարդկանց հետևելը նույնպես հիմարություն է, որովհետև շատերը սմարթֆոններ չունեն։ Ճիշտ է, իշխանությունների հիմնական թիրախը՝ նրան քննադատողների մեծ մասն ունի, բայց ոչինչ չի խանգարում, որ նրանք նոր՝ ավելի պարզ հեռախոսներ ձեռք բերեն, որոնց անհնար է հետևելը։

- Այս օրենքի ընդունումը հստակ ապացույց է, որ իշխանությունը խուճապի մեջ է և չի տիրապետում իրավիճակին։ Այն կարող է միայն մեկ խնդիր լուծել՝ իշխանության պահպանումը, սակայն կրկնեմ՝ համապատասխան մարդկային և տեխնիկական ռեսուրսների բացակայության պատճառով անգամ այդ խնդիրը չի լուծի։ Նիկոլ Փաշինյանը չի հասկանում, որ իշխանությունը պահպանելու համար հիմա անհրաժեշտ են անհապաղ միջոցառումներ մարդկային կյանքեր փրկելու համար։ Վաղը ոչ մի գաղտնալսում, ոչ մի թրաքինգ, ոչ մի PR ակցիա, ոչ մի ստախոսություն չի օգնի, եթե ամբոխը դառնա վարակված ու սոված։

- Օրվա իշխանություններից պահանջել, որ արտակարգ դրության ավարտից հետո հավաքված տվյալները ոչնչացվեն, անիմաստ է, քանի որ համաճարակից հետո այլևս իրենք չեն լինելու իշխանությունը։

- Այս օրենքը նպաստելու է համաճարակի տարածմանը, քանի որ այն ֆինանսական, մարդկային, կազմակերպական, ու ամենակարևորը՝ մտավոր ռեսուրսները, որ պետք է ուղղվեին համաճարակի տարածումը կանխելուն, ուղղվում են ինչ-որ հիմար նպատակի։

Հ․Գ․ Անգամ Հյուսիսային Կորեայում նման միջոցառումներ չկան, և ոչ միայն այն պատճառով, որ այնտեղ սմարթֆոններ չկան։ Հյուսային Կորեայում նաև վարակվածներ չկան, քանի որ այնտեղ վարակակիրներին տեղում գնդակահարում են։ Նիկոլ Փաշինյան, փորձեք նաև այս տարբերակը»։