Թոքերի օդափոխության միայն մեկ սարք ենք օգտագործում, որը հավանաբար կանջատենք. Արսեն Թորոսյան

Թոքերի օդափոխության միայն մեկ սարք ենք այս պահին օգտագործում, որը հավանաբար կանջատենք: Այս մասին այսօր՝ մարտի 30-ին, կառավարության արտահերթ նիստում հայտարարեց Առողջապահության նախարար Արսեն Թորոսյանը:

Վարչապետ Նիկոլ Փաշինյանը հարցրեց, թե ինչպիսին է դինամիկան ծանր վիճակում գտնվող 14 պացիենտների մոտ, ինչին նախարարը պատասխանեց. «Միջազգային վիճակագրություն կա, որ եթե պացիենտը ինտենսիվ թերապիայի է անցնում, ապա հիմնականում 50 տոկոսը գնում է ինկուբացիայի եւ դրանց շատ քիչ տոկոսն է ապրում: Մեր թվերը փոքր են եւ կանխատեսում անել մեր թվերի վրա դժվար կլինի: Ամեն կոնկրետ դեպքը ինդիվիդուալ է: Օրինակ ունենք մի դեպք, որ ծանր է, երիտասարդ է, սակայն մեծ հավանականությամբ կդադարի ծանր լինել եւ միջին կդառնա շուտով, ապա նաեւ կապաքինվի»:

Նրա խոսքով, քրոնիկական հիվանդություններն են կանխորոշում ելքը. «14 ծանր հիվանդներից 13-ն ունեն քրոնիկական հիվանդությունները, մեկը պարզապես շատ ուշ է դիմել: Այդ երիտասարդը երկկողմանի թոքաբորբ ունի ու եթե մի քիչ շուտ դիմած լիներ, հնարավոր է, ինքն էլ ծանրի չհասներ»:

NEWS.am