Ընկեր Փաշինյան, օրավարձով աշխատողները ո՞նց պիտի ապրեն, բանվոր դասակարգին էլ ուշադրություն դարձրեք. հարցախույզ Արմավիրում. Տեսանյութ

Ֆեյսբուքյան նամակ եմ ուղարկել վարչապետ Նիկոլ Փաշինյանին օրավարձով աշխատողներին աջակցություն տրամադրելու համար: Այս մասին Tert.am-ի հարցախույզի ընթացքում նշեց արմավիրցի անհատ տաքսու վարորդներից մեկը՝ հավելելով, որ ինքը ևս ցանկանում իր անվտանգությունն ապահովել, բայց չի կարող տանից դուրս չգալ:

«Գրել ենք ընկեր Փաշինյան, որ ամեն բան փակել եք, մարդիկ չեն կարողանում տնից դուրս գալ, ոնց պիտի ապրեն, գործ չկա: Ստիպված դուրս եմ եկել, որ 1000 դրամ հայթայթեմ, գնամ, երեխեքիս հաց առնեմ: Եթե պետությունը որոշակի առումով աջակցեր, ես էլ տնից դուրս չէի գա»,-ասաց Արմավիր քաղաքի բնակիչը:

Մեկ այլ անհատ տաքսու վարորդ նշեց, որ զարմացել են Նիկոլ Փաշինյանի այն հայտարությունից, թե օրավարձով աշխատող հասկացություն գոյություն չունի, և դրանք նրանք են, ովքեր ստվերում են: Ըստ վարորդների՝ այս իրավիճակում պետք է իշխանություններն ընդունեին ԲՀԿ-ի առաջարկը և օրավարձով աշխատողներին ամսական 70 հազար դրամ հատկացնեին:

«Այսօրվա խնդիրն ամբողջ աշխարհում է, պիտի կարողանանք հաղթահարել, բայց մեզ համար էլ պիտի պայմաններ ստեղծեն, որ հաղթահարենք: Գոնե բանվոր դասակարգի մասին էլ մտածեն, հասկանում ենք՝ պետք չէ տնից դուրս գալ, բայց դուրս եմ եկել հացի համար, առավոտից կանգնած եմ, 500 դրամ փող չեմ աշխատել: Հաց՝ որտեղի՞ց, վարձով ապրում եմ, 10 շունչ կա մեր ընտանիքում: Սպասում ենք, որ կառավարությունը մի բան անի»,-նշեց նա:

Հարցախույզին մասնակցող բնակիչների շարքում կային նաև բանվորներ, ովքեր գումարի դիմաց տարբեր աշխատանքներ են կատարում, բայց այս օրերին չեն կարողանում գումար վաստակել:

«Ես սանտեխնիկ եմ, էսօր կանչել են, թուղթը լրացրել եմ, դուրս եմ եկել, որ գոյությունս պաշտպանեմ, բայց գործ հիմնականում չկա»,-ասաց բնակիչը:

Մանրամասները՝ տեսանյութում։