Ինձ զգոնացնում էր Իտալիայի օրինակը, որ սկզբից մեծ-մեծ խոսեցին, դրա համար էի պահանջում, որ այստեղ խստացված ռեժիմներ շուտ սահմանեն. Արտավազդ Սահակյանը՝ նոր կորոնավիրուսի վտանգավորության մասին

Պետք է մեկուսացվել, ուրիշ տարբերակ չկա: Ամեն ինչ կախված է մեր կազմակերպվածությունից, կամքի ուժից, պետք է բժիշկների աշխատանքն էլ հարգել, որ օգնենք նրանց: Այս մասին Tert.am-ի հետ զրույցում ասաց պլաստիկ վիրաբույժ Արտավազդ Սահակյանը՝ անդրադառնալով նոր կորոնավիրուսի վտանգավորությանը:

«Այն շատ վտանգավոր վարակ է, բայց անհնարին չէ հաղթահարելը, չինացիներն ինչպես կարողացան հաղթահարել, նույնն էլ մենք պետք է անենք, դիմադրել, խուճապի չմատնվել»,- նշեց նա:

Հարցին՝ իշխանության կողմից ամեն ինչ արվո՞ւմ է պատշաճ դիմագրավելու համար վարակի մարտահրավերին, սկզբում նախարարի մակարդակով հայտարարվում էր, որ այն վտանգավոր վարակ չէ, Սահակյանն ասաց. «Ամեն ինչ կախված է երկրի տնտեսական հզորության վիճակից: Իտալիայի նման երկիրը եթե չի կարողանում ամբողջովին ապահովել, ապա մենք ինչպե՞ս կարող ենք: Դրա համար էլ պարզ է՝ որոշ դժվարություններ լինելու են, բայց հաղթահարելի արգելք է սա: Վստահ եմ՝ եթե մի քանի շաբաթ բոլորն իրենց տներում մնան, բուժվողը կբուժվի. վիրուսն էլ կվերանա տարածաշրջանում: Սա հաղթահարելի խնդիր է, ուղղակի ցանկալի է մինիմալ կորուստներով»:

Հարցին էլ՝ խստացված ռեժիմը և այս ամբողջ վերահսկողությունը ուշացա՞ծ չեն, նա արձագանքեց. «Եթե ինձ մնար, ես մարտի սկզբից էլ սահմանը կփակեի, բայց սա մի խնդիր է, որը վիրուսոլոգների ու իշխանությունների կայացման որոշումն էր: Ես վիրաբույժ եմ և այդ ոլորտի մասնագետ չեմ, ուղղակի մնացած երկրների օրինակները տեսնելով՝ կարծում էի, որ անմիջապես պետք է ավելի կոշտ միջոցառումներ կիրառել: Գրել էի այդ մասին, նույնիսկ մեղմ էի գրել այդ ժամանակ, բայց հիմա տեսնում եք, որ ճիշտ էի ասում»:

Սահակյանը միևնույն ժամանակ նշեց, որ հիմա պետք է կամզկերպված լինել, մոռանալ, որ սա իշխանություն է, նա ընդդիմություն է, բոլորը համախմբված պետք է պայքարեն, հիմնական թշնամին վարակն է այս պահին:

«Մի քիչ ուշացումով, բայց միջոցառումներ կատարում են, վերջիվերջո բոլորս էլ կարող ենք սխալվել փորձ չունենալու պատճառով: Ուղղակի ինձ զգոնացնում էր Իտալիայի օրինակը, որ սկզբից մեծ-մեծ խոսեցին, դրա համար էի ես պահանջում, որ խստացված ռեժիմներ շուտ սահամնեն, իհարկե ցանկալի կլիներ ավելի շուտ անեին: Բայց հիմա էլ գիշեր-ցերեկ աշխատում է նախարարը»,-շեշտեց նա: