Ի՞նչ ռիսկեր են ծառացել ԱՄՆ-ի առաջ նավթի համաշխարհային շուկայի ցնցումների արդյունքում

Կորոնավիրուսի ալիքների շարունակական տարածման ու նավթի համաշխարհային շուկայի ցնցումների արդյունքում տուժում են, ի վերջո, բոլորը, սակայն աշխարհակարգային իմաստով առանցքային ռիսկերն ու վտանգները ծառացել են հենց ԱՄՆ-ի առաջ: Դրանք, թերևս, երկուսն են.

1. ԱՇԽԱՐՀԱՏՆՏԵՍԱԿԱՆ: Նավթի գնի կտրուկ անկումն էապես սահմանափակել է ԱՄՆ-ում թերթաքարային նավթի արդյունահանման տեմպերը, ինչը մեծ հարցականի տակ է դնում Թրամփի ''the Golden Age of American Energy Dominance՛՛ ռազմավարությունը՝ ուղղված համաշխարհային շուկան ամերիկյան նավթով ու գազով հեղեղելուն: Թերթաքարային նավթը՝ իր ինքնարժեքով գրեթե երկու անգամ գերազանցելով ավադական նավթին, այլևս կկորցնի իր մրցունակությունը նավթի առկա ցածր գների պայմաններում: Դրան չի օգնի անգամ ավանդական դարձած դեմփինգը: Իսկ սա անխուսափելիորեն բերելու է ԱՄՆ-ում մի շարք սոցիալ-տնտեսական ու ռազմավարական ծրագրերի արմատական վերանայմանը, որոնց իրականացումն առավելապես կապվում էր ամերիկյան նավթի ու գազի արտահանման ծավալների շարունակական աճի հետ: Հարցականի տակ է դրվում նաև ԱՄՆ ռազմավարական հաղորդակցային ենթակառուցվածքների արդիականացման ծրագիրը, որը պահանջում է շուրջ 1 տրլն դոլար:

2. ԱՇԽԱՐՀԱՔԱՂԱՔԱԿԱՆ: Արդի գործընթացները լրջագույն հարված են հասցնում գլոբալիզացիային ու նեոլիբերալ գաղափարախոսությանը՝ համաշխարհային քաղաքական օրակարգում նոր շունչ հաղորդելով ազգային պետության կոնցեպտին: Պանդեմիան այս կարճ ժամանակահատվածում արդեն իսկ դարձրել է աշխարհն ավելի փակ, պետություններն՝ ավելի պրոտեկցիոնիստական, հասարակություններն՝ ավելի անհանդուրժողական: Ու որքան ավելի երկար տևի համաճարակը, այնքան ավելի կխորանան այդ միտումները՝ դառնալով նոր աշխարհակարգի ձևավորման առանցքային նախապայման: Միաժամանակ, կարող ենք կանխատեսել այդ աշխարհակարգում Արևելքի դերի շարունակական աճը, ինչն անխուսափելիորեն բերելու է արևելակենտրոն քաղաքակրթական պարադիգմայի հաղթանակի:

Վահե Դավթյանի ֆեյսբուքյան էջից