Ռուսական ռուբլին անկում ապրեց` հաղթահարելով մեկ դոլարը հավասար է 80 ռուբլի հոգեբանական պատնեշը

Ընդամենը մեկ օրվա ընթացքում ռուսական ռուբլին փլուզվեց՝ անկում գրանցելով 7 տոկոսով:

Այս ամենը կապված է նավթի գնի կտրուկ անկման հետ, որն էլ իր հերթին պայմանավորված է կորոնավիրուսով:

Այսպիսով կարող ենք արձանագրել, որ Ռուսաստանում ռուբլին արժեզրկվեց մեկ ամսվա ընթացքում ավելի քան 10 տոկոսով: Բնականաբար այս ամենը չի կարող իր հետ չբերել խուճապային տրամադրություններ այդ երկրում: Ռուսաստանի ԿԲ-ը դեռ կտրուկ միջոցների չի դիմում, համարելով, որ կորոնավիրուսի սրընթաց տարածման պայմաններում այդ քայլերը չեն օգնելու: Մյուս կողմից, եթե բնակչությունն անպաշտպան մնա այս պայմաններում, ապա խուճապը կարող է ավելի վատթարացնել իրավիճակը:

Կարելի է ասել, որ գրեթե նույնն է իրավիճակը Արևմուտքում: ԱՄՆ-ում ֆոնդային բորսաների սրընթաց անկումը այլևս ոչ մեկին չի զարմացնում: Ամերիկյան գլխավոր ֆինանսական կառույցի որոշումը՝ իջեցնել դոլարի հաշվարկման դրույքաչափը համարյա զրոյի, գրեթե ոչ մի ազդեցություն չթողեց բորսաների վրա: Ավելին, թվացյալ այս ճիշտ քայլը էլ ավելի անհանգստացրեց բաժնետերերին, որի արդյունքում բորսաների անկումը ավելի մեծ ցուցանիշներ արձանագրեց:

Սա շարքային համաշխարային ճգնաժամ չէ: Սա մի ճգնաժամ է, որի հետևանքները ոչ ոք չի կարող կանխատեսել: Իսկ եթե կորոնավիրուսի տարածումը շարունակվի, այլ ոչ թե կանգ առնի, ինչպես Չինաստանում, ապա համաշխարային տնտեսությունը կարող է հայտնվել ավերակների տակ:

Zham.am